11 mörk og nýtt markamet hjá ÍBV

Eyjastúlkur unnu sinn stærsta deildarsigur frá upphafi þegar þær lögðu Stjörnustúlkur, 11-0, í fjórðu umferð Landsbankadeildar kvenna í kvöld. Elín Anna Steinarsdóttir og Margrét Lára Viðarsdóttir skoruðu báðar þrennu fyrir ÍBV og hefur Margrét Lára nú skorað tíu mörk í fyrstu fjórum leikjunum. ÍBV skoraði sjö af 11 mörkum sínum í fyrri hálfleik en Eyjastúlkur höfðu unnið stærst 9-0 fyrir þennan leik í kvöld. ÍBV er nú tveimur stigum á eftir Val sem er á toppnum en ÍBV hefur skorað 28 mörk í fyrstu fjórum leikjum sínum eða sjö mörk að meðaltali í leik. Elín Anna Steinarsdóttir og Margrét Lára Viðarsdóttir skoruðu báðar þrennu fyrir ÍBV, Olga Færseth var með tvö mörk og þær Sara Sigurlásardóttir, Karen Burke og Elena Einisdóttir skoruðu allar eitt mark hver.