„Við eigum að vinna þessa leiki“

„Já, mér fannst allavega að við eigum að vinna þessa leiki, sérstaklega ef við ætlum að vinna riðilinn. Bara svekkjandi og ekki nægilega gott.“

Ísland fór með forystu inn í hálfleikinn en tókst ekki að bæta við öðru marki þrátt fyrir að komast í góðar stöður.

„Við vorum að komast í góðar stöður fannst mér, eða held ég, í seinni hálfleik líka. Spiluðum ágætlega, vorum í fínu flæði en þegar við komumst í þessar stöður náðum við ekki að ná þessari síðustu sendingu eða koma boltanum í netið og það er svo mikilvægt að skora annað, þriðja markið í þessum leikjum.“

Eistland jafnaði metin í seinni hálfleik og Andri sagði einbeitinguna hefði mögulega skort í jöfnunarmarki Eista.

„Ég veit það ekki. Við þurfum að fara yfir þetta betur eftir leik sem lið, sem við munum gera, en þetta mark sem við fáum á okkur eftir innkast er mögulega bara við ekki nógu einbeittir. Fókusinn var ekki 100% til staðar þegar þeir skora.“

Andri sagði þó ýmislegt jákvætt hægt að taka með í næsta leik gegn Lúxemborg.

„Það jákvæða er að við skoruðum gott mark og vorum ágætir á boltanum, ágætis færi, hefðum getað skorað fleiri en eitt mark í dag, bara áfram gakk.“