Biðjast af­sökunar eftir að keppandi kúkaði á sig

Keppnir á vegum Hyrox hafa aukist mjög í vinsældum undanfarin ár en um er að ræða átta kílómetra kapphlaup þar sem keppendur taka eina æfingu eftir hvern kílómetra. Allir keppendur eru á sömu braut og nota sama búnaðinn.

Myndefni af heimsmethafa kvenna í Hyrox-greinum, Joönnu Wietrzyk, úr keppni helgarinnar í Peking hefur farið víða á netmiðlum. Þar sést hún með hægðir niður leggi sína er hún heldur áfram keppni.

Hyrox hefur sætt gagnrýni vegna málsins og því velt upp hvers vegna Wietrzyk hafi verið heimilað að halda keppni áfram.

Það fór svo að hin ástralska Wietrzyk stóð uppi sem sigurvegari í keppni á laugardaginn er hún kláraði brautina á einum klukkutíma, einni mínútu og 23 sekúndum.

Moritz Fürste, stofnandi Hyrox, biðst afsökunar á atvikinu og segir hafa átt að grípa inn í.

„Hyrox gerði mistök að bregðast ekki við á meðan kapphlaupinu stóð,“ segir í yfirlýsingu frá Fürste. „Það er mitt hlutverk að sjá fyrir atvik sem þessi og ég gerði það ekki.“

„Við höfum þegar hafið vinnu að því að bæta gang keppna okkar og skoðum breytingar á reglubókinni strax. Frá og með þessu augnabliki eru nýjar reglur og ferli til staðar til að koma í veg fyrir að svona komi upp aftur,“ segir enn fremur í yfirlýsingunni.

Í nýjum reglum Hyrox hefur keppnisstjórnendum því verið gefin heimild til að draga keppendur úr keppni ef blóð, æla, þvag eða hægðir sem kunna að skapa hættu gagnvart velferð eða vegna mengunar gagnvart öðrum keppendum.