Hátt í þúsund manns mættu í matar- og vín­veislu Inn­nes

Hátt í þúsund gestir lögðu leið sína á sýninguna þar sem hægt var að smakka allt frá villibráð, spænskum tapasréttum og ítölskum eftirréttum yfir í vín, kokteila og kaffi.

Jóhanna Ýr Hallgrímsdóttir, markaðsstjóri Innnes, segir viðtökurnar hafa verið vonum framar. „Viðtökurnar voru frábærar, bæði frá viðskiptavinum okkar og þeim birgjum sem tóku þátt. Það er greinilega mikil þörf fyrir sýningu af þessu tagi og sérstaklega ánægjulegt að heyra hversu ánægðir gestir og þátttakendur voru með daginn.“

Maturinn fékk enn stærra hlutverk

Matur & vín var fyrst haldin árið 2024 og tókst þá afar vel. Strax í kjölfarið var ljóst að grundvöllur væri fyrir framhaldi og stefnt er að því að sýningin verði haldin annað hvert ár. 

Fyrsta sýningin tókst vonum framar og sýningin um helgina staðfesti endanlega að hún er komin til að vera.

Í ár var ákveðið að stíga enn stærra skref í matarhluta sýningarinnar. Fleiri matarbirgjar tóku þátt en árið 2024 og fjölbreytt hráefni og réttir fengu aukið vægi. „Við heyrðum frá mörgum gestum að aukið úrval matar hefði slegið í gegn. Það sýnir líka vel hversu vel þessir tveir heimar eiga saman, matur og vín, og endurspeglar því nafn sýningarinnar einstaklega vel.“

Frá villibráð yfir í spænska tapasstemningu

Sýningunni var skipt upp í nokkur svæði með ólíkum þemum. Á aðalsvæðinu voru um 40 vínbirgjar sem buðu gestum að kynna sér og smakka fjölbreytt úrval léttvína og sterkra drykkja. Þar var einnig langborð með pinnamat úr hráefnum sem Innnes flytur inn, ítölskum eftirréttum og úrvali af skinkum.

Í sýningareldhúsinu var hins vegar farið að horfa örlítið fram á veginn og hátíðarstemningin tekin snemma. Þar var meðal annars lögð áhersla á villibráð og ýmsar vörur og lausnir fyrir jólahlaðborðin.

Kokteilarnir fengu einnig sitt pláss. Á barnum var Koskenkorva-vodki í aðalhlutverki, en Innnes tók nýlega við sölu og dreifingu vörumerkisins á Íslandi.

„Þetta var kjörið tækifæri fyrir okkur til að kynna Koskenkorva sérstaklega og leyfa gestum að smakka fjölbreytta kokteila þar sem vodkinn var í aðalhlutverki,“ segir Jóhanna.

Suðræn stemning í útitjaldinu

Gestir þurftu ekki að fara langt til að ferðast örlítið sunnar á bóginn. Í útitjaldinu tók við suðræn tapasstemning þar sem meðal annars var boðið upp á paellu, osta, ólífur og pizzur ásamt Iberico-svínakjöti, kálfakjöti og írsku nautakjöti. „Þetta svæði vakti mikla lukku meðal gesta. Með matnum var svo hægt að smakka fjölbreytt úrval drykkja frá birgjum okkar, meðal annars bjór, gosdrykki og kokteila.“

Þeir sem vildu taka aðeins rólegri endasprett gátu síðan komið við á sérstöku kaffihúsasvæði. Þar kynnti Innnes fjölbreyttar lausnir í kaffiþjónustu fyrir fyrirtæki og að sjálfsögðu var eitthvað með kaffinu. Gestir gátu þar smakkað úrval brauðmetis og sætmetis.

Hátt í þúsund gestir mættu

Um 60 matvæla- og vínbirgjar tóku þátt í sýningunni Matur & vín í ár og segir Jóhanna erfitt að nefna nákvæma lokatölu gesta. Ljóst sé þó að vel hafi verið mætt. „Ég hef ekki fengið staðfesta lokatölu, en gróflega áætlað teljum við að hátt í þúsund manns hafi lagt leið sína á sýninguna á meðan hún stóð yfir.“

Að baki sýningu af þessari stærðargráðu liggur mikil vinna og segir Jóhanna árangurinn fyrst og fremst vera afrakstur öflugrar teymisvinnu starfsfólks Innnes. „Það eru ótrúlega margar hendur sem koma að undirbúningi og framkvæmd sýningarinnar og mig langar að færa starfsfólki Innnes kærar þakkir fyrir framlag þeirra. Það var sérstaklega ánægjulegt að sjá hversu tilbúnir allir voru að leggja sitt af mörkum til að gera daginn sem glæsilegastan.“

Og miðað við viðtökurnar þurfa unnendur matar og víns ekki að óttast að þetta hafi verið í síðasta sinn.

„Það væri ekki hægt að setja upp sýningu af þessari stærðargráðu nema með öflugri teymisvinnu og samstilltu átaki. Þetta sýnir svo vel hvað við getum áorkað þegar við vinnum öll saman að sama markmiði.“

Þorgeir Ólafsson ljósmyndari var á staðnum og tók nokkrar skemmtilegar myndir.