Andar­nefja í andar­slitrunum á Djúpa­vogi

„Við erum tvö í hvalabjörgunarsveit Djúpavogs, nýstofnaðri,“ segir Íris Birgisdóttir, æðarbóndi á Djúpavogi, í samtali við fréttastofu. 

Íris hefur verið niðri í fjöru í Brandsvík á sunnanverðumDjúpavogi síðan í morgun ásamt sjómanninum Bjarti Elí Egilssyni við að reyna að bjarga fimm metra langri andarnefju sem rak þar á land.

„Það var sjómaður sem varð var við hana hérna í fjörunni. Það hefur verið háflóð klukkan sex í morgun og við reiknum með því að hvalurinn hafi orðið innlyksa þegar það fór að fjara aftur,“ segir hún.

„Ákváðum að gera það sem við gátum“

„Það tók svo langan tíma fyrir alla aðila sem þurfa að koma að málinu þegar svona gerist, MAST, heilbrigðiseftirlitið og Náttúrufræðistofnun, að við vorum tvö sem ákváðum að þar til það væri hægt að taka ákvörðun þá myndum við reyna að láta dýrinu líða sem best,“ segir Íris.

„Það var sól og við ákváðum að gera það sem við gátum, halda hvalnum rökum og ausa yfir hann vatni.“ 

Þau hafi meðal annars lagt yfir hvalinn blaut handklæði til að hann þornaði ekki. Þegar blaðamaður ræddi við Íris um tvöleytið var útlitið ekki sérlega bjart og bærði andarnefjan sig varla nokkuð.

„Við erum komin upp úr fjörunni núna því það er reiknað með að hún reyni einhvern bægslagang til að koma sér út,“ segir Íris.

Lögreglan á Djúpavogi er á vettvangi og stýrir þar aðgerðum meðan hvalurinn er enn í fjörunni. Vonir standa til að hún geti komið sér sjálf aftur út á sjó.

„Dýralæknirinn kom svo og mat aðstæður þannig að það mætti alveg athuga hvort hún myndi reyna að koma sér sjalf út þegar það færi að flæða aftur,“ segir Íris.

Ástand andarnefjunnar liggi ekki skýrt fyrir og erfitt að meta nákvæmlega líðan hennar eða áverka en á annarri hlið hennar má sjá þónokkuð blóð. Næst sé að taka ákvörðun um hvort eigi að bjarga hvalnum eða lina þjáningar hans.

„Það er eiginlega verið að taka ákvörðun um það núna hvort hin raunverulega björgunarsveit, björgunarsveitin Bára, muni reyna að leiða hana út, hvernig svosem það er gert,“ segir Íris og bætir við: „Mögulega mun hún þurfa að deyja drottni sínum úr þessu eða þá hún fær aðstoð við það, svo hún kveljist ekki.“

Blaðamaður hringdi aftur í Írisi um þrjúleytið til að athuga stöðu mála og hafði andarnefjan þá náð að komast út á sjó en rekið í kjölfarið aftur á land.

„Hún synti út, tók smá hring fyrir framan fjöruna og rak svo aftur á land. Við vitum ekki hvort hún er bara búin á því eða búin að geispa golunni,“ sagði Íris þegar blaðamaður náði af henni tali.