Þyrlan kölluð út vegna manns sem féll í Stuðlagil

Tilkynning um slysið barst um klukkan eitt, að sögn Jóns Þórs Víglundssonar, upplýsingafulltrúar Landsbjargar. Hann hafði ekki frekari upplýsingar um þann sem féll í ána aðrar en að hann væri fullorðinn einstaklingur.

Fyrstu björgunarsveitarmennirnir eru mættir á staðinn en fleiri eru á leiðinni af Austurlandi. Þyrla Landhelgisgæslunnar lagði af stað með straumvatnsbjörgunarmenn frá sveitum á höfuðborgarsvæðinu nú eftir klukkan tvö.

Leit stendur yfir 

Í tilkynningu frá Lögreglunni á Austurlandi segir að um klukkan 13:15 hafi borist tilkynning um slysið. Fjölmennt lið björgunaraðila hafi strax verið kallað út og sé við leit að manninum. Frekari upplýsingar sé ekki hægt að veita að svo stöddu. 

Stuðlagil hefur verið vinsæll viðkomustaður ferðamanna á Austurlandi undanfarin ár. Erlend ferðakona á fertugsaldri lést þegar hún féll í ána í október árið 2024. Þremur og hálfu ári áður tókst nærstöddum að komu konu sem féll í klettum við gilið til bjargar.

Fréttin hefur verið uppfærð.