Van­traust UEFA á Infantino stendur sem og snið­ganga

Gianni Infantino, forseti FIFA, neitar að segja af sér. Eftir neyðarfund í gærkvöld kom hann bæði með afsökunarbeiðni til FIFA-ráðsins og hótun í garð gagnrýnenda sambandsins.

Á téðum neyðarfundi lýsti leiðtogahópur FIFA yfir fullum stuðningi sínum við Infantino í embætti forseta FIFA.

Infantino hefur verið í eldlínunni undanfarna viku, eða síðan áætlanir hans um utanaðkomandi fjárfestingar í FIFA voru gerðar opinberar. Plönin voru sett á ís eftir mikla mótspyrnu frá fótboltaheiminum.

Á sama tíma hafa ásakanir um fjárkúgun og spillingu á hendur Infantino skotið upp kollinum.

UEFA hefur lýst yfir vantrausti á Infantino og hótað sniðgöngu aðildarþjóða sinna í keppnum á vegum FIFA. 

Það að Infantino hafi fallið frá áætlunum sínum og komið með afsökunarbeiðni breyti engu. Það kemur skýrt fram í yfirlýsingu sem UEFA sendi frá sér í dag. 

Að öllu óbreyttu gætum við séð sniðgöngu aðildarþjóða UEFA á móti á vegum FIFA strax í næsta mánuði þegar að heimsmeistaramót undir 20 ára kvennalandsliða í Póllandi fer fram.