Gaf mömmu sinni gullmedalíuna: Gekk ó­frísk og ber­fætt yfir eyði­mörkina

Nico Williams var nýbúinn að fá gullverðlaunapeninginn um hálsinn en hann var ekki lengi þar. Hann leitaði að andliti í áhorfendaskaranum. Hann hljóp síðan í átt að stúkunni og setti gullverðlaunin um háls móður sinnar.

Móðir hans heitir María Arthuer og fór yfir eyðimörkina í leit að betra lífi fyrir hann og fjölskyldu sína. Hún tók við gullmedalíunni, setti hana um hálsinn og fagnaði innilega. Stoltari móður var ekki hægt að finna á leikvanginum.

Á tíunda áratugnum flúði María frá Gana í leit að betri framtíð. Hún fór ófrísk fótgangandi yfir Sahara-eyðimörkina, berfætt, og komst naumlega lífs af. „Margt sem ég myndi ekki óska neinum,“ segir sonur hennar.

Hún kom til Baskalands allslaus og ól upp tvo spænska landsliðsmenn í fótbolta: Iñaki og Nico.

„Ég er fljótur, en ekki jafn fljótur og mamma. Hún flúði dauðann og fór yfir eyðimörkina. Ég gaf henni verðlaunin mín því hún á þau miklu meira skilið en ég,“ sagði Nico Williams eftir leikinn en það má sjá atvikið hér fyrir neðan.