Maður dagsins á HM: Með bikarinn og margt fleira flúrað á kroppinn

Englendingar voru komnir með allt sitt lið inn í eigin vítateig en þá barst boltinn til Fernández, rétt utan teigs. Hann lét vaða og boltinn söng í netinu. Staðan 1-1 og Argentína lét kné fylgja kviði því Lautaro Martínez skoraði sigurmarkið skömmu síðar.

Fernández spilar því aftur til úrslita á HM eftir að hafa á undrahraða stimplað sig inn í lið Argentínu á HM 2022, aðeins 21 árs gamall og með aðeins þrjá vináttulandsleiki á ferilskránni.

Hann var valinn besti ungi leikmaðurinn á mótinu og hélt upp á heimsmeistaratitilinn með því að fá sér HM-styttuna sem tattú. Reyndar er Fernández með ansi mörg tattú og má sjá sum þeirra á myndunum hér að neðan. „Tímasetning Guðs er fullkomin,“ stendur meðal annars á kroppnum hans og á kannski við tímasetningu marksins sem hann skoraði í gærkvöld.

Fernández er einn af fimm bræðrum og var skírður í höfuðið á Enzo Francescoli — úrúgvæskum leikmanni sem vann Copa América í þrígang, er goðsögn hjá River Plate og var í miklu uppáhaldi hjá pabba Fernández. Hann á sjálfur tvö börn, Oliviu og Benjamin.

Eftir alla velgengnina á HM 2022 tóku Chelsea-menn upp veskið og gerðu Fernández að dýrasta leikmanni í sögu Bretlands, með því að semja við Benfica um kaupverð upp á um 121 milljón evra. Enn í dag er Fernández sjötti dýrasti leikmaður sögunnar.

Hann vann HM félagsliða fyrir ári síðan með Chelsea og lét þá flúra annan verðlaunagrip á sig. Tíminn hjá Chelsea hefur hins vegar ekki verið dans á rósum og undir lok síðustu leiktíðar, í apríl, ákvað þáverandi þjálfari liðsins Liam Rosenior að taka Fernández út úr leikmannahópnum í tvo leiki, eftir að Fernández hafði lýst yfir áhuga á að fara til Real Madrid. 

Spænska stórveldið fann sig knúið til að senda frá sér yfirlýsingu núna í byrjun júlí vegna fréttaflutnings og segja að félagið hefði ekki átt í neinum viðræðum, formlegum eða óformlegum, um að fá Fernández til félagsins. Forvitnilegt verður þó að fylgjast með framvindunni og hvort að Fernández taki slaginn áfram með Chelsea nú þegar liðið er ekki með í neinni Evrópukeppni en komið með nýjan mann í brúna sem talar sama tungumál og hann, Xabi Alonso.

Næsta mál á dagskrá hjá Fernández er hins vegar að spila úrslitaleik HM, í annað sinn, aðeins 25 ára gamall.