Brautarmet féllu hvert á fætur öðru í Dyrafjallahlaupinu

Þorsteinn Roy Jóhansson hljóp á mettíma í Dyrfjallahlaupinu en Þorbergur Ingi Jónsson átti brautarmetið fyrir daginn í dag en hann hljóp brautina á einni klukkustund, 55 mínútum og 39 sekúndum í fyrra. Nýtt brautarmet Þorsteins Roy er ein klukkustund, 48 mínútur og sjö sekúndur. Hann bætti því metið um heilar sjö mínútur.

Það verður að teljast mikil bæting og eru hlaupáhugamennirnir, Snorri Björnsson og Garpur I. Elísabetarson, ekki bjartsýnir á að metið hans Þorsteins verði bætt í bráð.

Miklu var búist við af Svíanum Tove Alexanderson sem er langbesta hlaupakona heims. Hún kom í mark í öðru sæti tæpum átta mínútum á eftir Þorsteini Roy. Hún stórbætti brautarmet kvenna en það setti Andrea Kolbeinsdóttir árið 2022 þegar hún hljóp brautina á tveim klukkustundum, 22 mínútum og 40 sekúndum. Tove Alexanderson kom í mark á einni klukkustund, 55 mínútum og 59 sekúndum og bætti hún því brautarmet kvenna um 27 mínútur.

Hún náði þó ekki að bæta met Þorbergs Inga frá því í fyrra en hún var aðeins fimmtán sekúndum frá meti hans. Það mátti því litlu muna að hún hefði náð því.