Felldu og af­klæddu styttur af fótboltamönnum

Skömmu fyrir upphaf heimsmeistaramótsins í mexíkósku höfuðborginni hafa brotist út átök milli kennara og lögreglunnar á staðnum.

Lögreglan beitti táragasi gegn mótmælandi kennurum til að koma í veg fyrir að þeir kæmust að hinu sögulega Zocalo-torgi. Þar er unnið að því að koma upp stuðningsmannasvæði með risastórum skjá fyrir heimsmeistaramótið í fótbolta, þar sem Mexíkó er ein af þremur gestgjafaþjóðum.

Átökin hófust þegar kennararnir, sem krefjast hærri launa og betri lífeyriskjara, brutu sér leið í gegnum eina af girðingunum sem settar hafa verið upp við innganginn að torginu, sem er staðsett rétt hjá stjórnarbyggingum Mexíkó.

Það sem vakti einna mesta athygli var hvað mótmælendurnir gerðu við fótboltastyttur sem var búið að koma upp í fullum herklæðum liða sem keppa á HM.

Kennararnir veltu þessum risastóru skúlptúrum af fótboltamönnum í þessum mótmælum en þessar fimm metra háu plaststyttur, sem gerðar voru til að fagna mótinu. Þær voru rifnar niður og krotað á þær af andófshópi innan kennarasambandsins.

Listaverkið sýnir fótboltamenn frá öllum heimshornum og er staðsett á trjáskyggðu breiðgötunni Paseo de la Reforma, sem er umkringd skýjakljúfum.

„Lengi lifi CNTE,“ stóð með rauðu letri á nakinni sýningardúkku. „Ef engin lausn finnst, mun boltinn ekki rúlla,“ stóð á annarri.

Styttur sem táknuðu Frakkland, Spán og Belgíu voru rifnar niður, afklæddar og brenndar af mótmælendum í Mexíkóborg.

Að minnsta kosti tveir slösuðust í átökunum við lögregluna á mánudag. Mótmælendur notuðu flugelda gegn lögreglunni til að bregðast við táragasinu.

Kennararnir hafa áður slegið upp búðum á Zocalo-torginu til að þrýsta á stjórnvöld en undanfarið hefur svæðið verið undir mikilli gæslu vegna undirbúnings fyrir HM.

Fyrsti leikur 23. heimsmeistaramótsins í fótbolta fer fram á Azteca-leikvanginum í Mexíkóborg 11. júní þar sem heimamenn í Mexíkó taka á móti Suður-Afríku.