Ver billjónum í „draum­óra“ um lengra líf

Ríkisstjórn Rússlands tilkynnti í síðasta mánuði að vísindamenn þar væru að vinna að genameðferð sem ætlað er að hægja á öldrun fruma í mannslíkamanum. Er það liður í sérstöku vísindaátaki sem Pútín hefur heitið því að verja rúmum 3,2 billjónum króna í (tólf núll).

Það vakti athygli í september á síðasta ári, þegar Pútín sótti Xi Jinping, kollega sinn í Kína heim, en þá heyrðust þeir tveir ræða tala um það að í dag væri sjötugur maður nánast bara barn. Pútín sagði þá að innan næstu áratuga væri hægt að græða ný líffæri í fólk og þannig yngja það og jafnvel öðlast ódauðleika.

Sjá einnig: Pútín og Xi ræddu ódauðleika í gegnum líffæragjöf

Xi svaraði um hæl og sagði einhverja sérfræðinga þeirrar skoðunar að á þessari öld muni maður geta lifað í allt að 150 ár.

Pútín verður 74 ára í haust og Xi verður 73 ára í sumar. Meðallífslíkur karlmanna í Rússlandi eru 68 ár. Í Bandaríkjunum eru þær um 76 og víða í Evrópu meira en áttatíu ár.

Vilja prenta eða rækta líffæri í smásvínum

Það að rækta eða jafnvel prenta ný líffæri fyrir fólk er einnig hluti af vísindaátaki Pútíns sem opinberað var fyrst árið 2024 og á að snúast um að bæta heilsu fólks, auk þess að lengja líf þess.

Samkvæmt frétt Wall Street Journal eru helst tvær leiðir sem vísindamenn eru að skoða varðandi það hvernig hægt eigi að útvega fólki þessi nýju líffæri. Ein leiðin er að prenta þau, ekki ósvipað og að prenta hluti með þrívíddarprenturum. Hin er að rækta þau inni í smásvínum sem þykja henta fyrir slíkt.

Vísindamenn í Rússlandi segjast hafa prentað brjósk fyrir menn og skjaldkirtil í mýs. Markmið þeirra er að græða fyrstu prentuðu líffærin í menn fyrir árið 2030. Svipaða sögu er að segja af tímalínu vísindamannanna þegar kemur að líffærum sem ræktuð eru í svínum.

Sjá einnig: Maðurinn látinn sem fékk grætt í sig svínshjarta

Í svari við fyrirspurn WSJ segja talsmenn Kremlar að rannsóknarverkefni þessi njóti stuðnings ríkisins og að margar stofnanir taki þátt í þeim.

Þeim er þó stýrt af fólki sem tengist Pútín. Önnur tveggja sem stýra þessu er María Voróntsóva, dóttir Pútíns. Hún er vísindamaður og stýrir ýmsum genatengdum rannsóknarverkefnum rússneska ríkisins.

Hinn er Mikhaíl Kóvaltjúk, sem stýrir kjarnorkurannsóknarstöðinni Kurchatov. Hann er bróðir Júrís Kóvaltjúk, sem er bankamaður og náinn bandamaður Pútíns. Mikhaíl Kóvaltjúk hélt því nýverið fram að vísindi myndu brátt gera fólki kleift að skipta út líkamshlutum og líffærum og öðlast þannig eilíft líf.

Segi Pútín það sem hann vill heyra 

Rannsóknir þessar í Rússlandi hafa sjaldan sem aldrei verið teknar til skoðunar af öðrum vísindamönnum í vísindagreinum. Það er að segja, að þær hafa aldrei farið gegnum svokallað jafningamat.

Alexander Ostróvskíj, rússneskur frumkvöðull á sviði þess að prenta líffæri, sagði í samtali við WSJ að erfitt væri að taka yfirlýsingar um rannsóknarvinnuna í Rússlandi alvarlega á meðan aðrir vísindamenn fá ekki að skoða hana.

Ostróvskíj, sem flutti frá Rússlandi eftir að Rússar gerðu innrás í Úkraínu og seldi fyrirtæki sitt þar, segir að frekar eigi að taka yfirlýsingum Rússa á þessu sviði sem vonum þeirra eða jafnvel draumórum. Þær séu líklega ekki til marks um raunverulegan árangur.

„Þeir eru líklega að segja Pútín það sem hann vill heyra til að fá meiri peninga.“

Rússneski útlagamiðillinn Meduza fjallaði um áðurnefna genameðferð haustið 2024 en þar kom fram að aldraðir ráðamenn Rússlands hefðu mikinn áhuga á leiðum til að draga úr eða hægja á öldrun. Mikhaíl Kóvaltjúk sé sérstaklega áhugasamur og jafnvel með þráhyggju.

Þá ræddu blaðamenn Meduza við rússneska vísindamenn sem voru fullir efasemda um ætlanir og markmið átaks Pútíns. Þeim hafði verið skipað að hætta að vinna að öðrum verkefnum og einbeita sér að þessum.