Kröfum Musks gegn OpenAI hafnað

Musk hefur sakað Altman og aðra um að „stela góðgerðafélagi“ og plata hann með því að breyta rekstri OpenAI svo það yrði hagnaðardrifið. Auðjöfurinn segir að alltaf hafi staðið til að reka OpenAI í þágu mannkyns. Eins og þekkt er þróaði OpenAI mállíkanið ChatGPT.

Lögmenn Altmans og OpenAI segja hins vegar að Musk hafi verið ljóst að til stæði að breyta rekstri félagsins. Hann hefði krafist þess að fá stjórn á félaginu en þegar því hafi verið hafnað hafi hann slitið tengslin við OpenAI í fússi og seinna meir stofnað eigið gervigreindarfyrirtæki.

Musk krafðist 22 billjóna króna frá OpenAI. Hann vildi einnig að Altman yrði sparkað úr stjórn fyrirtækisins og það yrði aftur fært í fyrra horf.

Sjá einnig: „Það er ekki í lagi að stela góðgerðafélagi“

Það tók kviðdómendur einungis tvær klukkustundir að komast að þeirri niðurstöðu að Musk hefði beðið of lengi með að höfða mál. Hin meintu brot á rétti hans væru fyrnd.

Musk höfðaði málið um sumarið 2024 en hin meintu brot eiga að fyrnast á þremur árum. Kviðdómendur komust að þeirri niðurstöðu að Musk hefði verið meðvitaður um ætlanir stjórnenda OpenAI fyrir árið 2021.

Um alríkisréttarhöld var að ræða, þar sem kviðdómendur voru í raun í ráðgefandi hlutverki en dómarinn, Yvonne Gonzalez Rogers, var hlynnt niðurstöðu þeirra, samkvæmt AP fréttaveitunni.

Lögmaður Musks hefur þegar lýst yfir að hann ætli að áfrýja úrskurðinum, samkvæmt New York Times.

Hætti og stofnaði eigið fyrirtæki

Musk, Altman og nokkrir vísindamenn á sviði gervigreindar stofnuðu OpenAI fyrir rúmum tíu árum, árið 2015. Félagið er hvað þekktast fyrir ChatGPT mállíkanið, sem fjölmargir nota víðsvegar um heiminn. Á endanum yfirgaf Musk þó félagið og stofnaði sitt eigið gervigreindarfyrirtæki árið 2023 sem heitir xAI.

Forsvarsmönnum OpenAI varð fljótt ljóst að félagið þyrfti fúlgur fjár til að þróa gervigreind og til að fjárfesta í nauðsynlegum innviðum hennar, eins og gagnaverum. Var rekstri félagsins því breytt.

Verjendur Altmans og OpenAI sögðu við upphaf réttarhaldanna að það hefðu ekki verið Altman og hinir sem vildu hagnast á OpenAI á sínum tíma heldur hafi það verið Musk. Þess vegna hafi hann hætt í fýlu og stofnað sitt eigið fyrirtæki.

Sjá einnig: Birta tölvupósta frá Musk

Í opnunarávarpi sínu sagði Wiliam Savitt, lögmaður OpenAI, að eina ástæðan fyrir réttarhöldunum væri sú að Musk hefði ekki fengið vilja sínum framgengt varðandi OpenAI. Hann sagði Musk hafa notað hótanir um fjárveitingar gegn öðrum stofnendum til að ná stjórn á félaginu og að hann hafi viljað sameina OpenAI við bílafyrirtækið Tesla.