„Að­eins þeim sem vilja ekki að Arsenal verði meistari fannst þetta ekki vera brot“

Eitt stærsta augnablik tímabilsins í ensku úrvalsdeildinni kom í uppbótartíma leiks West Ham og Arsenal í fyrradag. Callum Wilson hélt þá að hann hefði jafnað í 1-1 en eftir nokkuð langa bið var markið dæmt af vegna brots Pablo á Raya.

Dómurinn var stór og þýðingarmikill, bæði í topp- og botnbaráttunni, en réttur að mati Carraghers. 

„Gleymið þessu augljósa. Þetta tók svona langan tíma því það var svo margt að skoða. Pressan sem fylgir þessari ákvörðun, hvaða þýðingu hún hafði, ekki bara fyrir þessi tvö lið, heldur einnig Manchester City og Tottenham, er svo mikil að ég held að enginn ætti að kvarta yfir því hversu langan tíma þetta tók,“ sagði Carragher í Monday Night Football á Sky Sports í gær.

„Komust þeir að réttri niðurstöðu? Já. Það eru tveir hópar fólks sem fannst þetta ekki vera brot. Þeir sem hafa tengsl við City og West Ham og þeir sem vilja ekki að Arsenal vinni deildina. Ástæðan fyrir öllu uppþotinu er að það eru svo margir sem vilja ekki að Arsenal verði meistari.“

Komast ekki upp með allt

Carragher gefur lítið fyrir þau rök að Arsenal beiti öllum mögulegum brögðum í föstum leikatriðum og komist upp með meira í þeim efnum en andstæðingar þeirra.

„Þú getur ekki gripið í hönd markvarðar og stöðvað hann í að lyfta höndinni. Það getur ekki gerst. Fólk er vælandi á samfélagsmiðlum og alls staðar: Arsenal kemst upp með allt. Mér finnst þeir ekki gera það,“ sagði Carragher.

Leandro Trossard skoraði eina mark leiksins á Lundúnaleikvanginum í fyrradag en skömmu áður varði Raya frábærlega frá Mateus Fernandes. Arsenal er með fimm stiga forskot á toppi ensku úrvalsdeildarinnar en City getur minnkað það niður í tvö stig með sigri á Crystal Palace annað kvöld.

Eftir að hafa tapað fyrir City, 2-1, 19. apríl hefur Arsenal unnið þrjá deildarleiki í röð án þess að fá á sig mark.

Næsti leikur Arsenal er gegn Burnley á Emirates á mánudaginn kemur.