Tón­leikum Yasiin Bey frestað með dags fyrir­vara fram á haust

Þetta kemur fram í tilkynningu frá tónleikahaldaranum Liveproject. Þar segir að allir miðar haldi gildi sínu á nýrri dagsetningu, 10. september, en þau sem komist ekki þann dag geti fengið endurgreitt á stubb.is/yasiinbey.

„Við hjá Liveproject biðjumst afsökunar á þeim óþægindum sem þessar óviðráðanlegu aðstæður geta valdið og þökkum á sama tíma öllum sem hafa staðið með okkur og verið partur af menningu sem er að blómstra á Íslandi. Við munum halda ótrauð áfram að rækta hana og skapa ógleymanlegar minningar saman,“ segir jafnframt í tilkynningunni.

Yasiin Bey, áður þekktur sem Mos Def, sló í gegn á tíunda áratugnum sem hluti af hip-hop-dúóinu Black Star ásamt Talib Kweli. Á sólóferli sínum hefur hann gefið út sígildar plötur á borð við Black on Both Sides og The New Danger og starfað með listamönnum á borð við Kanye West, Madlib og J Dilla.