Inter er Ítalíumeistari

Þrátt fyrir að þrjár umferðir séu eftir af ítölsku deildinni á ekkert lið möguleika á að ná Inter. Ríkjandi meistarar Napoli eru í næsta sæti fyrir neðan og í þriðja sætinu situr nágrannaliðið AC Milan.

Marcus Thuram var maðurinn sem tryggði titilinn en hann skoraði sigurmark leiksins í uppbótartíma fyrri hálfleiks, eftir stoðsendingu frá Piotr Zielenski.

Parma er búið að bjarga sér frá falli og veitti litla samkeppni í þessum leik. Inter var með öll völd á vellinum og Henrikh Mkhitaryan bætti öðru marki við í seinni hálfleik.

Þetta er þriðji meistaratitill Inter á síðustu sex tímabilum en sá fyrsti undir stjórn Cristian Chivu. Margir misstu trú á honum þegar Inter tapaði tveimur af fyrstu þremur leikjum tímabilsins en Chivu hefur snúið öllum á sitt band. 

Titlarnir gætu líka orðið fleiri, Inter á eftir að mæta Lazio í bikarúrslitaleik og gæti tryggt tvennuna.