Saka danskt topp­lið um að tapa viljandi

„Það er aldrei leyfilegt að tapa viljandi, sama hver ástæðan er.“

Þannig hljóða reglur um hagræðingu úrslita hjá Íþróttasambandi Danmerkur við spurningunni um hvort megi tapa viljandi ef tap getur veitt íþróttalegt forskot.

Á laugardaginn tapaði Bjerringbro-Silkeborg (BSH) 26-27 fyrir Grindsted á útivelli í síðustu umferðinni. Mjög óvænt tap sem veitir BSH einmitt íþróttalegt forskot í úrslitakeppninni því þeir forðast riðilinn með Aalborg og GOG. TV2-sjónvarpsstöðin fjallar um málið og þar má sjá myndband frá leiknum.

Í úrslitakeppninni er liðunum átta sem komast í úrslitakeppnina skipt í tvo fjögurra liða riðla þar sem tvö efstu liðin komast áfram í undanúrslitin.

Í hálfleik var BSH þó yfir 18-15 og í seinni hálfleik var forystan fljótt aukin í 20-15. Þaðan í frá var þó eins og allt færi úrskeiðis hjá gestunum sem töpuðu boltanum sjö sinnum og klúðruðu tólf skotum á markið – þar á meðal nokkrum tilraunum sem fóru langt fram hjá marki Grindsted.

Í síðustu fjórtán sóknunum skoraði BSH aðeins tvö mörk, þar af var annað markið til að minnka muninn á síðustu sekúndunni.

En þýðir það að BSH hafi tapað viljandi? Já, er svarið ef handboltasérfræðingur virti Bent Nyegaard er spurður en hann hefur horft á seinni hálfleikinn. Sérstaklega síðustu tuttugu mínúturnar eru pínlegar, fullyrðir hann.

„Á síðustu tuttugu mínútunum skorar BSH fjögur mörk. Það er á allan hátt, eftir að hafa séð leikinn, óafsakanleg frammistaða í leik sem leikmenn höfðu annars fullkomna stjórn á. Það er erfitt að fá ekki þá tilfinningu að BSH hafi ekki viljað fá stig út úr leiknum,“ sagði Nyegaard.

„Sum skotin eru beinlínis vandræðaleg. Þetta eru færir leikmenn eins og Rahbek, Læsø og Øris sem skjóta bara alveg fram hjá eða taka hugsunarlaus skot. Það er það sem styrkir þessa tilfinningu, auk þess sem gerður er fjöldi mistaka,“ sagði Nyegaard.