Glódís vissi strax upp á sig sökina

Glódís er fyrirliði Bayern München og hún leiddi liðið út á Old Trafford í sögulegum leik í gærkvöld, þegar United spilaði í fyrsta sinn í 8-liða úrslitum Meistaradeildar Evrópu.

Pernille Harder kom Bayern tvívegis yfir í leiknum en United náði jafnoft að jafna og kom fyrra markið eftir víti sem dæmt var á Glódísi. 

Eins og sjá má í hápunktum leiksins hér að neðan gerði Glódís enga tilraun til að mótmæla dómnum, eftir að hennar gamli liðsfélagi Lea Schüller skaut boltanum upp í hönd Glódísar.

Vítadóminn og öll helstu atvik úr leiknum má sjá að neðan:

Glódís hugsar þó eflaust liðsfélögum sínum þegjandi þörfina eftir að hafa fengið Schüller eina gegn sér í vítateignum, eftir að United-liðið spilaði sig auðveldlega í gegnum fjóra leikmenn Bayern úti á kanti.

En Bayern endaði á að vinna leikinn 3-2 þökk sé fallegu sigurmarki hinnar tvítugu, japönsku Momoko Tanikawa sem skoraði á 84. mínútu.

Bayern er því með forskot fyrir seinni leik liðanna á Allianz Arena næsta miðvikudagskvöld, þar sem það ræðst hvort það verður Glódís eða United sem kemst í undanúrslit Meistaradeildarinnar í fyrsta sinn á ferlinum. Þangað hefur Bayern nefnilega ekki komist frá árinu 2021, eða áður en Glódís gekk í raðir félagsins.