Þjóðargleði lýst yfir í Venesúela eftir sigur gegn Banda­ríkjunum

Úrslitaleikurinn litaðist óneitanlega af pólitísku spennunni sem ríkir milli landanna eftir að Bandaríkin réðust inn í Venesúela í janúar og handtóku forsetann Nicolás Maduro.

Þrátt fyrir að úrslitaleikurinn færi fram í Miami í Bandaríkjunum var Venesúela meira á heimavelli. Reglulega heyrðist baul þegar Bandaríkin léku sinn leik. Talið er að meirihluti þeirra rúmlegu 36 þúsund áhorfenda sem voru í stúkunni geti rakið ættir sínar til rómönsku Ameríku.

Bandaríkin voru þó talin sigurstranglegri, enda er liðið skipað stjörnum og þekktum nöfnum úr MLB deildinni. Venesúela hafði hins vegar komið öllum á óvart með því að komast í úrslitaleikinn en liðið lagði meðal annars ríkjandi heimsmeistara Japan á leiðinni þangað.

Donald Trump hafði meira að segja hrósað Venesúelamönnum fyrir vasklega framgöngu.

„Þeir líta virkilega vel út. Góðir hlutir að gerast í Venesúela upp á síðkastið, ég velti því fyrir mér hvaða töfrar gætu verið þar að verki. RÍKISSTAÐA, #51, EINHVER?“ skrifaði forsetinn fyrir leik á samfélagsmiðlinum Truth Social.

Venesúela vann leikinn á endanum 3-2 eftir að hafa komist 2-0 yfir þökk sé heimahafnarhlaupum Maikel Garcia og Wilyer Abreu. Daniel Palencia og Eugenio Suarez tryggðu svo þriðja stigið til að loka leiknum fyrir Venesúela.

„Enginn hafði trú á Venesúela, en við erum meistarar. Hvað get ég sagt? Guð er góður,“ sagði Suarez eftir að hafa tryggt sigurinn.

Gríðarleg gleði braust út á leikvanginum í Miami og stuðningsmenn Venesúela fögnuðu þessum óvænta sigri langt fram á nótt. Eins dags vinnustöðvun og þjóðargleði var síðan lýst yfir í Venesúela af sitjandi forsetanum, Delcy Rodríguez.

Bandaríkjaforsetinn Trump var snöggur að bregðast við tapinu og birti aðra færslu á Truth Social þar sem hann sagðist vilja gera Venesúela að ríki innan Bandaríkjanna.

Burt séð frá pólitíkinni sem því fylgir þá myndu Bandaríkin, með því að innlima Venesúela, allavega losna við einn keppinaut um næsta heimsmeistaratitil í hafnabolta. Bandaríkjamenn hafa þurft að sætta sig við silfrið á síðustu tveimur heimsmeistaramótum í íþróttinni sem þeir fundu upp og eru augljóslega í sárum.