Gæti orðið flughált síð­degis

Frá þessu segir á vef Vegagerðarinnar, umferdin.is. Þar segir að blint verði á Hellisheiði og í Þrengslum í suðaustanhríð, sérstaklega á milli klukkan 11 og 14 en fer svo að rigna þar einnig.

Hálka er nokkuð víða á suðvestanverðu landinu, svo sem í Þrengslum, í Hvalfirði, á Krýsuvíkurvegi, Vatnsleysustrandarvegi og víðar. Snjóþekja er í Kjós og hálkublettir eru nokkuð víða á öðrum leiðum.

Á Norðausturlandi eru vegir lokaðir um Mývatns- og Möðrudalsöræfi, Vopnafjarðarheiði og Hófaskarð. Ófært er á Hólasandi, Kelduhverfi, Hólaheiði og á milli Þórshafnar og Vopnafjarðar. Snjóþekja eða hálka er á flestum öðrum leiðum.

Á Austurlandi eru vegirnir um Fjarðarheiði og frá Djúpavogi að Höfn lokaðir. Þæfingur er á Fagradal ásamt skafrenningi og einbreiðum köflum en þæfingur er í Norðfirði. Ófært er víða, meðal annars um Vatnsskarð eystra, Öxi og Breiðdalsheiði.

Á Suðurlandi eru hálkublettir á milli Víkur og Klausturs. Annars verður hálka eða hálkublettir á flestum leiðum en snjóþekja á stöku stað.

Á Vesturlandi er víða hálka en eitthvað er um hálkubletti og snjóþekju. Á Vestfjörðum er hálka á flestum leiðum.

Á Norðurlandi er snjóþekja á Öxnadalsheiði og Ólafsfjarðarvegi en hálka á mörgum leiðum. Víkurskarði hefur verið lokað vegna snjóa.