Heitir því að rota og meiða McGregor illa ef þeir mætast

Undir lok síðasta árs tjáði McGregor sig um að hann hafi gengist undir upplýsandi meðferð og fundið guð og síðan þá, af myndskeiðum af samfélagsmiðlum að dæma, virðist hann vera kominn vel á veg í undirbúningi fyrir endurkomu í bardagabúrið á vegum UFC. 

McGregor hefur oft á tíðum komið sér í kastljósið undanfarin ár og oftar en ekki í miður skemmtilegum málum þar sem hann hefur verið ásakaður um kynferðisbrot og líkamsárásir.

Nú er mikið rætt um að McGregor muni snúa aftur í bardagabúrið og hefur hann verið orðaður við bardaga á bardagakvöldið við Hvíta Húsið í Bandaríkjunum sem ráðgert er að fari fram þann 14.júní næstkomandi. 

Sjálfur sagðist Conor hafa samþykkt boð um að mæta lítt þekktum andstæðingi og að hann bíði nú eftir því að skrifa undir samninginn til að staðfesta bardagann. 

Töldu margir að um væri að ræða bardaga við Carlos Prates sem hefur unnið sex en tapað einum bardaga til þessa í UFC. Tapið kom á móti Íranum Ian Garry. 

Prates hefur ekkert heyrt af meintum bardaga gegn Conor McGregor og sendir Íranum varnaðarorð í myndbandi sem birtist á Instagram.

„Í fullri hreinskilni tel ég að það muni reynast erfitt að láta þennan bardaga verða að veruleika. Conor hefur staðið utan bardagabúrsins núna í að verða fimm ár, algjörlega frá MMA og að þessum fimm árum liðnum tel ég að hann myndi ekki vilja mæta skemmtilegasta bardagakappanum í veltivigtinni.“

Bardagi við Conor McGregor heillar hins vegar Prates og segir að sá bardagi myndi ekki enda vel fyrir Írann.

„Ég hef ekkert á móti honum en allir vita það. Ég veit það. Hann veit það. Ég myndi meiða hann illa og rota hann. Það væri ekki besta leiðin fyrir hann til þess að snúa aftur í bardagabúrið.“

McGregor varð á sínum tíma sá fyrsti til þess að verða ríkjandi meistari í tveimur þyngdar­flokkum á sama tíma í UFC. Hann hefur hins vegar ekki barist síðan í júlí árið 2021 þegar að hann laut í lægra haldi gegn Dustin Poiri­er.