„Auð­mjúkur, þakk­látur og stoltur“

Landsliðið náði nýverið sínum besta árangri í 16 ár þegar það lenti í fjórða sæti á EM sem fram fór í Danmörku, Noregi og Svíþjóð. Snorri Steinn var að stýra Íslandi í þriðja sinn á stórmóti og framfaraskref verið tekin á hverju móti.

Hann skrifaði undir þriggja ára samning þegar hann tók við 2023 og því ljóst að samningurinn er laus. Viðræður við HSÍ um framlengingu standa yfir en Snorri finnur einnig fyrir áhuga annarsstaðar frá.

„Umboðsmaðurinn minn er helvíti vakandi fyrir þessum hlutum. Þetta er alveg spes bransi. En auðvitað finn ég fyrir það að athyglin eykst. Bæði hefur það gerst hægt og rólega eftir að ég tek við og einnig með þessum árangri,“ segir Snorri og bætir við:

„Það er eitthvað sem ég hef alltaf bakvið eyrað. Það er mjög óhollt að plana mikið sem þjálfari. Ég held það sé ekkert sniðugt að gera það.“

Fyrst og fremst er hann þakklátur fyrir að sinna starfi landsliðsþjálfara og segir starfi sínu með liðið ekki lokið.

„Ég er bara auðmjúkur, þakklátur og stoltur af því að vera landsliðsþjálfari Íslands í handbolta. Ég tek því ekki sem sjálfsögðum hlut. Auðvitað er ég bara í viðræðum við HSÍ og það bara mjakast í rétta átta, held ég. Þó ég skipti mér lítið af þeim, ég er bara með mann í því,“

„Ég finnst ég ekki vera búinn sem þjálfari hjá þessu liði. Mér finnst við sem hópur eiga eitthvað inni. Meðan mér líður þannig vil ég einblína á það,“ segir Snorri.

Ekki viss um orkustigið til að sinna báðu

Snorra hafa boðist störf sem þjálfari félagsliðs og því velt upp hvort hann sé með augun á því að stýra jafnvel félagi samhliða landsliðinu, sem tíðkast víða í handboltanum. Hann segist hafa orðið eirðarlaus á köflum sem þjálfari landsliðsins en sé ekki að flýta sér.

Einbeitingin sé fyrst og fremst á landsliðinu.

„Eftir að hafa upplifað þrjú mót og síðast þetta mót, er ég ekki viss um að ég hafi orkuna sem ég þarf að hafa til að geta farið beint í félagslið,“ segir Snorri sem horfði til að mynda upp á aðstoðarlandsliðsþjálfarann Arnór Atlason fara beint af mótinu út á æfingagólf með Álaborg í Danmörku.

Snorri vonast til að samningaviðræðurnar skili árangri og framhald hans sem landsliðsþjálfari sé þannig tryggt.

„Það er plan A. Það samtal er í gangi. Öll samtöl geta farið í báðar áttir en ég á ekki von á að þetta fari í skrúfuna. Ég er ekki að deyja úr stressi yfir þessu – ekki ennþá,“ segir Snorri.

Töluvert meira kemur fram í löngu viðtali við Snorra þar sem Evrópumótið er gert upp og farið um víðari völl. Viðtalið má sjá í heild að neðan.