Metáhorf á Ís­landi og þriðjungur Dana sá sigurinn

Þetta kemur fram á vef RÚV í dag en þar segir að meðaláhorf á undanúrslitaleikinn, þar sem Ísland freistaði þess að komast í úrslitaleik EM í fyrsta sinn, hafi verið 66,4%.

Ef miðað er við mannfjölda á Íslandi í byrjun síðasta árs (389.444 íbúar) þýðir það að 258.591 manns hafi að meðaltali horft á leikinn á hverri mínútu í íslensku sjónvarpi. Það er mesta áhorf á íþróttaviðburð á Íslandi en byrjað var að mæla áhorf árið 2008.

Áður höfðu leikir Íslands við Króatíu (meðaláhorf 63,1%) og við Slóveníu (62,5%) á Evrópumótinu slegið við metinu sem sett var í fyrsta leik Íslands á HM karla í fótbolta, gegn Argentínu árið 2018, þegar meðaláhorfið var 62,4%.

Núna eru sex leikir Íslands af EM 2026 á meðal tíu efstu íþróttaviðburða í íslensku sjónvarpi, fyrir mesta meðaláhorfið. Uppsafnað áhorf (fjöldi þeirra sem horfði á einhverjum tímapunkti á viðburðinn) á leik Íslands og Danmerkur var svo slétt 70% en það hefur hins vegar áður verið meira, til dæmis á HM í fótbolta 2018 og á EM í handbolta 2010.

Mikill áhugi hjá heimaþjóðinni

Áhuginn á EM í handbolta var ekki bara gífurlegur á Íslandi því til að mynda í Danmörku, heimalandi sigurvegaranna, sáu meira en tvær milljónir manna eitthvað af úrslitaleiknum við Þýskaland sem Danir unnu, á heimavelli sínum í Herning.

Þannig var það einnig þegar Danir unnu Íslendinga á föstudaginn í undanúrslitunum, svo að um þriðjungur dönsku þjóðarinnar sá þann leik í sjónvarpi. Þá fylgdist hálf milljón danskra sjónvarpsáhorfenda með hátíðarhöldunum við ráðhúsið í Herning í gær.