Óðinn stór­kost­legur: „Þessi á­kvörðun var spot on hjá Snorra“

Óðinn fékk hæstu einkunn fyrir leikinn í gær þar sem hann skoraði sjö mörk, fiskaði þrjá ruðninga og smitaði út frá sér orku og baráttuhug. Rætt var um Óðin í Besta sætinu og má hlusta á þáttinn hér að neðan og á hlaðvarpsveitum.

„Hann fiskaði þrjá ruðninga og var bara frábær. Hans framlag inni á vellinum og heilt yfir í mótinu hefur verið stórkostlegt,“ sagði Einar Jónsson í Besta sætinu.

Snorri Steinn ákvað að taka Óðin með á EM sem eina hreinræktaða hægri hornamanninn en Teitur Örn Einarsson, sem Íslendingar þekkja betur sem skyttu, er honum til halds og trausts en hefur nánast ekkert spilað. Sigvaldi Björn Guðjónsson og fleiri sitja heima en Óðinn hefur verið í slíkum ham að það hefur engu máli skipt.

„Ef einhver er glaður þá er það Snorri“

„Hann er búinn að vera algjörlega aleinn þarna, frábær í vörn, stelur boltum, tekur ruðninga, fyrstur fram í hraðaupphlaup. Ég hélt á tímabili að hann færi upp í stúku, til að fagna með áhorfendum. Þegar hann fiskar ruðning eða stelur bolta þá fagnar hann því jafnvel meira en þegar hann hamrar boltann upp í skeytin. Þetta er ógeðslega dýrmætt,“ sagði Einar.

„Ef einhver er glaður þá er það Snorri. Hann tók smáséns og valdi í raun bara einn hægri hornamann. Ef Óðinn hefði svo átt lélegt mót þá getið þið rétt ímyndað ykkur hvað Snorri væri búinn að fá að heyra það. Hvar Sigvaldi væri og hvernig honum dytti þetta í hug,“ sagði Jóhann Gunnar Einarsson og Einar greip þann bolta á lofti:

„Hann er varla búinn að fá að anda allt mótið en gaurinn er í sturluðu standi. Þetta er ein af þessum ákvörðun sem Snorri hefur tekið, sem hefði getað farið í báðar áttir en gekk upp. En við eigum tvo geðveika leiki fram undan og það er spurning hvernig Óðinn verður þar. En við erum búin að ná okkar markmiðum og þetta gekk upp. Þessi ákvörðun var spot on hjá Snorra,“ sagði Einar.