Kristian fiskaði rautt og fékk svo rautt

Kristian, sem tryggði Íslandi jafnteflið dýrmæta gegn Frakklandi í síðasta mánuði, lék allan leikinn í kvöld.

Ekkert mark var skorað en rauða spjaldið fór tvisvar á loft í uppbótartímanum. Fyrst eftir að Mohamed Hamdaoui gaf Kristiani olnbogaskot og svo örfáum mínútum síðar þegar Kristian fékk sjálfur rauða spjaldið.

Dómari leiksins ætlaði upphaflega að gefa Kristian gult spjald en eftir skoðun á myndbandi breytti hann því í rautt spjald.

Twente er nú með sextán stig í 7. sæti deildarinnar en Telstar er í þriðja neðsta sæti, því sextánda, með níu stig.

Næstu leikir Kristians eru landsleikirnir mikilvægu í lokaumferðum undankeppni HM, þegar Ísland mætir Aserbaísjan næsta fimmtudag og svo Úkraínu þremur dögum síðar.