Ljóst að D66 varð stærri en flokkur Wilders

Samkvæmt nýjustu tölum er D66 með naumt forskot á Frelsisflokkinn, um fimmtán þúsund atkvæði. Frelsisflokkinn, sem hefur lengi barist gegn komu múslíma til landsins, sleit ríkisstjórnarsamstarfi í sumar sem varð til þess að boðað var til þriðju þingkosninganna í landinu á síðustu fjórum árum. 

Líklegt þykir að leiðtogi D66, hinn 38 ára Rob Jetten, muni nú reyna að mynda ríkisstjórn. Takist honum það verður hann yngsti forsætisráðherrann í sögu landsins. 

Spár gera nú ráð fyrir að D66 og Frelsisflokkurinn muni báðir ná 26 mönnum á þing, en alls sitja 150 þingmenn á hollenska þinginu. Möguleiki er á að D66 geti náð einu þingsæti til viðbótar og þar með ná inn 27 mönnum, en reiknað er með að talningu ljúki á mánudaginn.

Frelsisflokkurinn mældist stærstur í könnunum fyrir kosningarnar en D66 var á mikilli siglingu á lokasprettinum og vann sigra í Rotterdam, Haag og Utrecht svo dæmi séu tekin. 

Núverandi tölur benda til þess að alls fimmtán flokkar nái mönnum inn á þing. Þriðji stærsti flokkurinn er VVD sem mælist nú með 22 þingmenn inni. Græni vinstriflokkurinn mælist með tuttugu menn inni, Kristilegir demókratar átján og JA 21 með níu.