Albert og Mikael Egill í vondum málum á Ítalíu

Mario Hermoso kom Roma yfir eftir sendingu Paulo Dybala í kvöld. Artem Dovbyk tvöfaldaði forystuna áður en Alessandro Circati minnkaði muninn fyrir Parma.

Roma er nú með 21 stig eftir 9 umferðir líkt og Napoli. Á sama tíma er Parma með sjö stig í 15. sæti.

Albert var í byrjunarliði Fiorentina sem sótti Inter heim. Staðan var markalaus í hálfleik en í þeim síðari settu heimamenn í fimmta gír. 

Hakan Çalhanoğlu kom Inter yfir á 66. mínútu og fimm mínútum síðar hafði Petar Sučić tvöfaldað forystuna. Çalhanoğlu gerði svo endanlega út um leikinn á 88. mínútu með marki úr vítaspyrnu. Mattia Viti hafði gerst brotlegur og fékk því dæmt á sig víti og nældi í leiðinni í sitt annað gula spjald og var því sendur snemma í sturtu.

Lokatölur 3-0 Inter í vil sem er nú með 18 stig í 3. sæti. Fiorentina og Albert, sem spilaði 63 mínútur, eru í 19. sæti með fjögur stig.

Hinn 23 ára gamli Mikael Egill spilaði allan leikinn þegar Genoa tapaði 0-2 á heimavelli fyrir Cremonese. Genoa er í neðsta sæti með þrjú stig.

Önnur úrslit

• Como 2-1 Verona
• Juventus 3-1 Udinese
• Bologna 0-0 Torino