Bókaþjófur herjar á ís­lenska rit­höfunda á ný

Ólafur Jóhann fékk sendan tölvupóst í dag frá ónefndum aðila sem þóttist vera Páll Valsson, útgáfustjóri Bjarts & Veraldar, þar sem hann óskaði eftir óútgefinni bók Ólafs Jóhanns sem PDF-skjal. Þjófurinn lét sér ekki nægja að senda einn tölvupóst heldur ítrekaði beiðnina eftir að engin svör fengust.

„Hann er gamall prófarkalesari hann Ólafur Jóhann að hann tók eftir því að netfangið passaði ekki, það var Vallson, og lét okkur vita undir hádegi af þessu,“ segir Páll Már Ólafsson, útgefandi Bjarts & Veraldar, í samtali við fréttastofu en mbl.is greindi frá.

Skilaboðin voru á íslensku en segir Páll að ef hann hefði lesið þau á hlaupum hefðu málfarsvillurnar ef til vill farið framhjá honum. Til dæmis stóð í tölvupóstinum „ég finn ekki það núna.“ Páll Már segir skeytin minna á skeyti sem Filippo Bernadini, bókaþjófur sem stal yfir þúsund handritum, sendi á hann sjálfan.

„Þetta var fyrir þremur, fjórum árum, þá var þessi Bernadini sem herjaði á alla. Ég var í miklum samskiptum við hann,“ segir Páll.

Bernadini þóttist þá vera Hallgrímur Helgason en Páll vissi að Hallgrímur lægi inni á sóttvarnarhóteli vegna kórónuveirusmits. Hann sagði í skilaboðum til Bernardini að hann hefði látið senda handritið á hótelið, þrátt fyrir mótmæli Bernardini.

„Ég áttaði mig á því hvað klukkan sló.“

Páll Már segist þó ekki átta sig á hvers vegna þjófari líkt og Bernardini girnist óútgefnar bækur, enginn fjárhagslegur ávinningur felist í því heldur sé einungis verið að eyðileggja fyrir þeim. 

Vara útgefendur við

Félag íslenskra bókaútgefanda hefur sent öllum útgefendum tölvupóst þar sem varað er við slíkum þjófum. Bryndís Loftsdóttir, framkvæmdastjóri félagsins, segir að stærri útgefendur líkt og Bjartur & Veröld hafi fengið tölvupósta þar sem reynt er að komast yfir óútgefin handrit.

Bryndís segir mikið álag núna þar sem margir séu að senda bækurnar sínar í prent og því séu PDF-skjöl „á ferð og flugi.“ Hún hafi því sent viðvörun á útgefendur til að allir gætu verið á varðbergi.

Pétur Már tekur undir að bæði rithöfundar og útgefendur þurfi að hafa varann á.