Innlent

Gullkistan opnuð á Vest­fjörðum

Silja Rún Sigurbjörnsdóttir skrifar
Forseti Íslands setti hátíðina í treyju liðsins Vestra.
Forseti Íslands setti hátíðina í treyju liðsins Vestra. Aðsend/Haukur Sigurðsson

Mikið var um dýrðir á Ísafirði um helgina þegar stórsýningin Gullkistan var sett af forseta Íslands. Með atvinnuvegasýningunni er ætlað að sýna hvað starfsemi á Vestfjörðum hefur upp á að bjóða.

Í fréttatilkynningu frá Vestfjarðastofu segir að rúmlega áttatíu fyrirtæki, stofnanir, listamenn og frumkvöðlar komu sér fyrir á sýningarsvæðinu sem er í íþróttahúsinu á Torfsnesi í Ísafjarðarbæ. Halla Tómasdóttir setti sýninguna, klædd Vestra-treyju, á laugardagsmorgun en viðstödd voru einnig Hanna Katrín Friðriksson atvinnuvegaráðherra og Guðmundur Ingi Kristinsson, mennta- og barnamálaráðherra.

Ýmis tónlistaratriði voru sett á stokk.Aðsend/Haukur Sigurðsson

„Sýningin Gullkistan Vestfirðir heppnaðist stórkostlega vel. Íþróttahúsið á Torfnesi var fullt af góðum gestum í allan dag og kom það fólki á óvart hversu gríðarmikla breidd er að finna í vestfirsku atvinnu- og menningarlífi. Sýnendur voru himinsælir með aðsóknina og fundu líka kjörinn vettvang til að efla tengsl innan svæðis og kynnast nýju fólki,“ sagði Anna Sigríður Ólafsdóttir, einn af skipuleggjendum sýningarinnar hjá Vestfjarðastofu.

Atvinnuvegaráðherra sótti sýninguna.Aðsend/Haukur Sigurðsson

Auk sýningarinnar var hægt að hlusta á alls kyns tónlist, til dæmis djassdúó og kvennakór. Þá hélt Guðni Th. Jóhannesson, fyrrverandi forseti Íslands, erindi um söguna af togvíraklippunni í þorskastríðinu við Breta.

Það var margt í boði á sýningunni.Aðsend/Haukur Sigurðsson

Önnur erindi voru haldin, svo sem um framtíðarskipulag Vestfjarða og fjárfestingar og nýsköpun.

Fjöldi fólks kynnti sér alls konar fyrirtæki og stofnanir.Aðsend/Haukur Sigurðsson



Fleiri fréttir

Sjá meira


×