Spurs að landa Xavi Simons

Samkvæmt enskum fjölmiðlum er Simons staddur á Englandi og hefur lokið læknisskoðun hjá Tottenham.

Talið er að Spurs greiði Leipzig 51,8 milljónir punda fyrir Simons. Að öllum líkindum verður gengið frá félagaskiptunum á næstu klukkutímunum.

Simons var sterklega orðaður við Chelsea í sumar en hann virðist nú að öllum líkindum vera á leið til annars Lundúnaliðs.

Spurs tókst ekki að ganga frá kaupum á ensku landsliðsmönnunum Morgan Gibbs-White og Eberechi Eze en er nú að landa hinum 22 ára Simons sem lék með Leipzig í tvö tímabil. Hann skoraði 22 mörk í 78 leikjum fyrir þýska liðið.

Simons var í yngri liðum Barcelona og Paris Saint-Germain og lék nokkra leiki fyrir aðallið PSG. Hann var svo lánaður til PSV Eindhoven tímabilið 2022-23 þar sem hann skoraði 22 mörk í 48 leikjum.

Tottenham hefur unnið báða leiki sína í ensku úrvalsdeildinni til þessa án þess að fá á sig mark.

Spurs tekur á móti Bournemouth klukkan 14:00 á morgun. Leikurinn verður sýndur beint á Sýn Sport 3.