„Gaman þrátt fyrir skrýtnar kring­um­stæður“

„Þetta var bara gaman, en líka svolítið skrýtinn leikur eftir fyrri úrslitin,“ sagði Gísli í viðtali eftir leik.

„Það var svona eins og bæði lið litu á þetta sem hálfgerðan æfingaleik. En þetta var bara gaman þrátt fyrir frekar skrýtnar kringumstæður, en bara mjög gaman.“

Hann segir einnig að það geti verið frekar erfitt að gíra sig upp í svona leik, þar sem úrslitin eru svo gott sem ráðin eftir fyrri leikinn.

„Það er öðruvísi, klárlega. En það þarf bara að nýta leikinn í að vinna í hlutum sem þarf að vinna í og við þurftum alveg að gera það. Þetta er búið að byrja aðeins brösulega heima fyrir, en mér fannst bæði lið bara nýta leikinn vel úr því sem komið var.“

„Við vildum bara vinna í hlutum sem við þurftum að vinna í og svo var líka mikið um breytingar. Það voru sumir sem þurftu hvíld og við spilum aftur í deildinni á laugardaginn þannig að þetta var svona bland af því að prófa nýja hluti og svo bara að koma skrokknum í lag fyrir næsta leik líka.“

Með sigrinum eru Gísli og félagar komnir í þriðju umferð forkeppni Meistaradeildar Evrópu og um leið búnir að tryggja sér sæti í deildarkeppni Evrópudeildarinnar ef allt fer á versta veg. Liðið mætir Rauðu stjörnunni í þriðju umferð forkeppni Meistaradeildarinnar.

„Það leggst mjög vel í mig. Það verður alvöru verkefni og þetta verða tveir risaleikir sem ég er mjög spenntur fyrir,“ sagði Gísli að lokum.