Fer fyrst í frí en semur svo við Liverpool

Skúbbarinn heimsfrægi Fabrizio Romano er fyrir löngu búinn að staðfesta það að Wirtz verði leikmaður Liverpool en í framhaldinu komu samt engar fréttir af læknisskoðun eða undirritun samninga.

Umræddur Romano hefur nú fullvissað alla um að hann hafi ekkert verið of fljótur á sér.

Allt sé klappað og klárt varðandi þessi metkaup Liverpool á Wirtz en það verður þó ekki gengið frá þessu strax.

Liverpool ætlar að leyfa Wirtz að fara í frí til að jafna sig eftir langt og strangt tímabil.

Hann mun síðan koma til Liverpool eftir fríið sitt, fara í læknisskoðun og skrifa undir samning.

Það er samt hundrað prósent búið að ganga frá öllum lausum endum samkvæmt Fabrizio Romano.

Hann endar fréttina með sínum fræga slagorði „Here we go“ en bætir bara við „soon“ í endann eða bráðum á íslensku.

Hvort Wirtz fái frí í fríinu frá ljósmyndurum og öðrum er síðan allt önnur saga.