Rekinn frá Tottenham

Þetta fullyrða breskir miðlar rétt í þessu en búist er við tilkynningu frá Tottenham innan skamms varðandi þetta. 

Uppfært 16:08 - Tottenham hefur nú gefið út yfirlýsingu þar sem brotthvarf Ange Postecoglou er staðfest.

Í yfirlýsingu Tottenham segir að eftir yfirferð á árangri og frammistöðu liðsins á síðasta tímabili sé ákvörðunin sú að láta Postecoglou fara. Ákvörðunin sé tekin með hag félagsins að leiðarljósi. Ekki sé hægt að líta fram hjá döprum árangri í ensku úrvalsdeildinni á nýafstöðnu tímabili

Undir stjórn Postecoglou vann Tottenham Evrópudeildina á nýafstöðnu tímabili og batt þar með enda á sautján ára titlalausa göngu en gengi liðsins í ensku úrvalsdeildinni var á sama tíma hins vegar alls ekki gott. Tottenham lauk þar leik í 17.sæti og hefur aldrei í sögu ensku úrvalsdeildarinnar sótt eins fá stig (38) og á síðasta tímabili.

Forráðamenn Tottenham segja að þrátt fyrir sigurinn í Evrópudeildinni sé ekki hægt að láta góðu tilfinningarnar tengdum þeim árangri ráða för inn í framtíðina.  

Sigurinn í Evrópudeildinni sér til þess að Tottenham mun taka þátt í Meistaradeild Evrópu á næsta tímabili, það sem og aðrir þættir virðast hafa ýtt forráðamönnum félagsins í þá átt að betra væri að fá inn nýjan þjálfara til þess að leiða liðið áfram inn í það tímabil. 

Akkúrat tvö ár hafa liðið upp á dag síðan að Postecoglou tók við stjórnartaumunum hjá Tottenham en þar áður hafði hann verið þjálfari skoska liðsins Celtic. 

Þjálfari Hákonar þykir líklegastur í starfið

Nú þegar eru spekingar farnir að velta því fyrir sér hver muni taka við stjórnartaumunum hjá Tottenham. Þar þykir Daninn Thomas Frank, þjálfari enska úrvalsdeildarfélagsins Brentford vera líklegastur til þess að vera ráðinn inn. 

Undir stjórn Frank tryggði Brentford sér sæti í ensku úrvalsdeildinni árið 2021 og hefur síðan þá fest sig í sessi í deildinni og spilað afar heillandi fótbolta á köflum. 

Frank hefur stýrt Brentford síðan árið 2018 en þar áður var hann þjálfari Bröndby ásamt því að hafa fyrir það þjálfað yngri landslið Danmerkur. 

Íslenski landsliðsmarkvörðurinn Hákon Rafn Valdimarsson er leikmaður Brentford. 

Aðrir þjálfarar sem eru orðaðir við þjálfarastöðuna hjá Tottenham eru Marco Silva þjálfari Fulham og Oliver Glasner þjálfari ensku bikarmeistaranna í Crystal Palace.

Fréttin verður uppfærð