Enski boltinn

Sonur Bruno Fernandes mætti á æfingu hjá FH

Sindri Sverrisson skrifar
Bruno Fernandes, Ana Pinho og börnin þeirra tvö eftir að tímabili Manchester United lauk á Old Trafford 25. maí. Pinho kom til Íslands í stutt frí á meðan að Fernandes er upptekinn með portúgalska landsliðinu.
Bruno Fernandes, Ana Pinho og börnin þeirra tvö eftir að tímabili Manchester United lauk á Old Trafford 25. maí. Pinho kom til Íslands í stutt frí á meðan að Fernandes er upptekinn með portúgalska landsliðinu. Getty/Matt McNulty

Á meðan Manchester United-fyrirliðinn Bruno Fernandes er upptekinn með portúgalska landsliðinu var fjölskylda hans stödd á Íslandi um helgina og tók fjögurra ára sonur hans þátt í æfingu hjá FH.

Fernandes og eiginkona hans, Ana Pinho, eru góðir vinir Jóhanns Bergs Guðmundssonar og Hólmfríðar Björnsdóttur, og hið sama má segja um börn hjónanna sem eru á sama aldri.

Pinho kíkti því með börn þeirra Fernandes í heimsókn til Hólmfríðar á Íslandi, nú þegar Jóhann og Bruno eru í landsliðsverkefnum, og fékk sonurinn Goncalo að kíkja á æfingu hjá FH. 

Þetta mátti sjá á mynd sem Pinho endurbirti á Instagram, frá Helgu Björnsdóttur, systur Hólmfríðar, þar sem synir systranna og Goncalo eru á æfingu í FH-treyjum.

Goncalo, sonur Bruno Fernandes, var mættur á æfingu FH með Birni Berg vini sínum og frænda hans.Skjáskot/@anaapinho_

Fjölskyldur Fernandes og Jóhanns kynntust vel þegar Jóhann lék á Englandi en hann færði sig svo til Sádi-Arabíu í fyrra.

Fernandes íhugaði sterklega að fylgja í kjölfar Jóhanns núna í sumar og var með í höndunum risatilboð frá Al-Hilal. Hann ráðfærði sig meðal annars við Jóhann en mun að lokum hafa ákveðið að hafna tilboðinu og halda kyrru fyrir hjá United.

„Við höfum auðvitað talað mikið um þetta. Hann [Fernandes] átti frábært tímabil og við ræddum mikið um þetta. Það er erfitt þegar það eru svona peningar í spilinu en hann hefur enn hungur í að vera áfram í United og vill koma liðinu á þann stall sem liðið á að vera. Bara gríðarlega vel gert hjá honum að neita þessu og vera ekki bara að hugsa um peningana,“ sagði Jóhann í samtali við Fótbolta.net í vikunni.




Fleiri fréttir

Sjá meira


×