Nikótínþurfi guðs­barn braust inn í Bjarnabúð

Greint er frá innbrotinu á Facebook-síðu Bjarnabúðar. „Óvænt næturvinna 😭,“ segir þar um innbrotið og má jafnframt sjá mynd af innbrotsþjófnum.

„Einhver óboðinn kom til okkar í nótt og braust inn. Eitthvað hefur viðkomandi verið svangur og nikótínþurfi,“ segir í færslunni. Túlka má það sem svo að viðkomandi hafi stolið mat og nikótíni en fréttastofa hefur ekki náð í eigendur Bjarnabúðar í dag.

„Ef einhver kannast við kauða bið ég viðkomandi að hafa samband við Lögregluna á Selfossi,“ segir svo í færslunni sem hefur verið deilt 143 sinnum frá því hún birtist í morgun.

Bjarnabúðarmenn hafa þó ekki látið innbrotið neitt á sig fá og opnuðu á sama tíma og venjulega, klukkan 11.