Innlent

Hefur skilning á báðum sjónar­miðum í Heið­merkur­málinu

Jón Ísak Ragnarsson skrifar
Dóra Björt Guðjónsdóttir er oddviti Pírata í borgarstjórn.
Dóra Björt Guðjónsdóttir er oddviti Pírata í borgarstjórn. Stöð 2

Fyrirhugaðar breytingar á skipulagi við útivistarsvæðið í Heiðmörk þar sem til stendur að girða af stór svæði í þágu vatnsverndar hafa vakið hörð viðbrög. Oddviti Pírata í borgarstjórn kveðst hugsi yfir skotgröfunum sem málið hefur lagst í, en hún hefur mikinn skilning á báðum sjónarmiðum sem takast á.

Veitur stefna að því að loka stóru svæði Heiðmerkur fyrir almennri bílaumferð á næstu árum í nafni vatnsverndar. Þá eru áform um að stækka girt svæði í kringum Myllulækjarvatnsbólið til muna með þeim afleiðingum að rask verður á gönguleiðum.

Málið verði tekið fyrir í umhverfis- og skipulagsráði

Dóra Björt segir að verið sé að hefja ákveðið ferli, ákveðna deiliskipulagsvinnu, sem á að verða sáttmáli þeirra deiluaðila sem koma að málinu, Skógræktarfélagsins og Veitna.

Verkefni sem borgin leggi mikla áherslu á snúi að bílaumferð á svæðinu til lengri tíma litið, en ekki eigi að loka fyrir bílaumferð strax.

„En ég hef bara mikinn skilning fyrir báðum sjónarmiðum og ólíkum sjónarmiðum, og hef í raun samt talið að það þurfi einhvern veginn að stíga niður í þessari upplýsingaóreiðu sem hefur svolítið einkennt málið. Þess vegna hef ég beðið um að þetta mál verði tekið fyrir í umhverfis- og skipulagsráði í næstu viku og að allir aðilar máls komi að borðinu,“ segir Dóra Björt.

„Þannig að við getum svolítið velt við hverjum steini í því og já spurt áleitinna spurninga, fengið svör, til þess að reyna komast til botns í því til dæmis hvort það sé einhver ástæða til þess að skoða vatnsverndarsamþykktina betur sem að þessi girðing snýst um.“

„Það er mörgum sem sárnar það þetta mun auðvitað gera það að verkum að við þurfum að flytja svokallaðan ríkishring sem er mjög dýrmætur og mörg flott svæði þarna fyrir innan sem skipta fólk verulegu máli.“

„Á sama tíma erum við með vatnsverndina.“

„Hreint vatn á höfuðborgarsvæðinu er einstakt á heimsvísu og það skiptir öllu máli að standa vörð um það.“

„Þannig hérna eru bara ólík sjónarmið en ég held að þetta sé algjörlega mögulegt að finna einhverjar góðar lausnir í málinu. Rísa upp úr þessum skotgröfum.“

Viðtalið við Dóru Björt er lengra og hægt er að hlýða á það í heild sinni í spilaranum hér fyrir ofan.

Skipulagslýsing vegna nýs deiliskipulags Heiðmerkur er nú aðgengileg í skipulagsgátt Skipulagsstofnunar. Þar kemur fram að Heiðmörk eigi áfram að vera aðgengilegt útivistarsvæði í sátt við vatnsvernd og leiðarljósið sé að tryggja öryggi og óbreytt gæði grunnvatns til langrar framtíðar, og að svæðið nýtist áfram til útivistar í sátt við vatnsvernd.

Dóra Björt hvetur almenning til að skila inn athugasemdum, en frestur rennur út 18. júní næstkomandi.


Tengdar fréttir

Áformin dragi veru­lega úr mögu­leikum til úti­vistar

Formaður Skógræktarfélags Reykjavíkur lýsir áhyggjum af fyrirætlunum Veitna um að loka fyrir bílaumferð um Heiðmörk. Vel sé hægt að tryggja vatsnvernd án þess að skikka útivsitarfólk til margra kílómetra göngu.




Fleiri fréttir

Sjá meira


×