„Sumir þurftu því miður að yfir­gefa svæðið“

Infantino var sakaður um að setja sína eigin pólitísku hagsmuni í forgang og hafa af þeim sökum mætt of seint á 75. þing FIFA sem fram fer í Asunción, höfuðborg Paragvæ.

Infantino var á ferðalagi um Mið-Austurlönd ásamt Donald Trump, Bandaríkjaforseta, og mætti til Asunción eftir að þingið átti að hefjast. Upphafi þingsins var frestað um þrjá klukkutíma af þessum sökum.

Infantino útskýrði ferðalag sitt með því að hann hefði verið að nýta mikilvægt tækifæri til að vera „fulltrúi fótboltans“ í „mikilvægum samræðum“ við „leiðtoga heimsins í stjórnmálum og efnahagsmálum“, samkvæmt frétt BBC.

Til að mótmæla hegðun Infantino og lýsa vanþóknun sinni með táknrænum hætti þá yfirgaf hópur af fulltrúum Evrópu samkunduna á fimmtudag og sneri ekki aftur þann dag. Samkvæmt frétt The Athletic fór Alexander Ceferin, forseti UEFA, fyrir þessum hópi sem í voru allir átta fulltrúar Evrópu í FIFA-ráðinu.

Ísland á ekki sæti í ráðinu en fulltrúar KSÍ eru hins vegar mættir á þingið eins og fulltrúar annarra knattspyrnusambanda.

Ekki óskastaða

Þorvaldur Örlygsson, formaður KSÍ, var viðstaddur þingið ásamt framkvæmdastjóranum Eysteini Pétri Lárussyni og varaformanninum Helgu Helgadóttur. Í samtali við íþróttadeild segir Þorvaldur ýmsa aðila frá Evrópu hafa þurft að fara snemma vegna ferðatilhögunar sinnar. Þingið átti að klárast upp úr hádegi og áttu fjölmargir flug yfir Atlantshafið fljótlega eftir það.

„Þetta átti að byrja klukkan 9:30 en var frestað af ófyrirsjáanlegum ástæðum varðandi seinkun forsetans til Paragvæ. Menn og lönd svo sem búin að gera sína ferðatilhögun beint eftir þingið sem átti að klárast klukkan 13:00 og menn gætu farið heim,“ segir Þorvaldur.

Fulltrúar KSÍ gengu ekki út, en líkt og segir að ofan voru það fulltrúar FIFA-ráðsins sem gerðu það í mótmælaskyni. Aðrir innan vébanda UEFA fóru þá vegna ferðatilhögunar en fulltrúar KSÍ áttu flug seinna um kvöldið og sátu því þingið til enda þann daginn.

Menn á ferðalagi í einn og hálfan sólarhring

Ljóst er að tímasetning og staðsetning FIFA-þingsins hefur legið fyrir um hríð og Infantino í forsvari fyrir alþjóðasambandið sem skipuleggur viðburðinn. Líkt og Þorvaldur segir er ekki einfalt að ferðast til og frá Paragvæ fyrir aðila sem koma þangað frá hinu enda hnattarins og miklar ráðstafanir sem fylgja.

Er þá ekki bagalegt að hann sýni ekki meiri virðingu en svo að mæta seint, vegna eigin pólitísku duttlunga?

„Í sjálfu sér er það ekki óskastaða, það segir sig sjálft. Því miður kom þessi staða upp og menn svo sem ekki allir sáttir við það. Þetta er ekki stutt ferðalag. Ágætur vinur minn frá Armeníu ferðaðist í 38 tíma og auðvitað eru menn ekki ánægðir en þetta var staðan og menn reyna að gera sitt besta úr því. Sumir þurftu því miður að yfirgefa svæðið,“ segir Þorvaldur.

Áratugur frá skandalnum

Skandall skók FIFA fyrir áratug síðan og greiddi hann leið Infantino að forsetastólnum. Nánast hver einasti maður í framkvæmdanefnd sambandsins, þar á meðal forsetinn Sepp Blatter, var dæmdur í lífstíðarbann frá fótbolta og fjölmargar kærur lagðar fram vegna hvítflibbaglæpa yfirmanna hjá sambandinu í starfi.

Infantino var fenginn inn til að taka sambandið í gegn og á yfirborðinu áttu sér stað gríðarmiklar breytingar á starfsemi FIFA. Infantino hefur aftur á móti verið sakaður um að vinda ofan af meintum breytingum og stjórnarhættir FIFA hafi lítið breyst.

Hvernig upplifir Þorvaldur menninguna innan sambandsins?

„Þetta er stórt og mikið alþjóðlegt samband sem er í því að reyna að skaffa meiri tekjur fyrir öll landssambönd og knattspyrnuhreyfinguna í heild sinni. Það eru vissulega skiptar skoðanir. Þarna er mismunandi kúltúr og mismunandi fólk, það er gaman að upplifa það og maður er svo sem alltaf að læra eitthvað nýtt,“ segir Þorvaldur.