Guardiola hótar að hætta

Nokkrir af leikmönnum City voru ekki valdir í hóp liðsins í leiknum gegn Bournemouth í gær, þar á meðal Rico Lewis og Savinho. 

Guardiola er ósáttur með að þurfa að skilja leikmenn eftir uppi í stúku og vill vinna með minni leikmannahóp á næsta tímabili. Annars muni hann segja upp.

„Ég sagði við félagið að ég vildi ekki stærri hóp. Ég vil ekki skilja 5-6 leikmenn eftir í frystinum. Ég vil það ekki. Ég mun hætta. Hafið hópinn minni og þá mun ég halda áfram,“ sagði Guardiola eftir leikinn gegn Bournemouth sem City vann, 3-1.

„Það er ómögulegt fyrir mig að segja leikmönnunum mínum að þeir geti ekki spilað.“

Mikil meiðsli herjuðu á leikmannahóp City á kafla í vetur en eftir að liðið endurheimti flesta sína leikmenn er samkeppnin um sæti í liðinu og að komast í hóp á leikdag orðin ansi hörð.

„Í 3-4 mánuði gátum við ekki valið ellefu leikmenn. Við vorum ekki með varnarmenn svo það var erfitt. Eftir það sneru leikmenn aftur en þetta getur ekki verið svona á næsta tímabili,“ sagði Guardiola.

„Ég sem þjálfari get ekki þjálfað 24 leikmenn og í hvert sinn sem ég þarf að velja verða nokkrir að vera eftir heima í Manchester því þeir geta ekki spilað. Þetta gerist ekki. Ég tjáði félaginu að ég vilji þetta ekki.“

Kevin De Bruyne lék sinn síðasta heimaleik fyrir City í gær en hann er eini leikmaðurinn sem ljóst er að yfirgefur félagið í sumar.

City keypti fjóra leikmenn í janúar auk þess sem Claudio Echeverri sneri aftur eftir lánsdvöl hjá River Plate í Argentínu.