Frestuðu fögnuði Liverpool með sýningu

Arsenal sá til þess að Liverpool gæti ekki fagnað Englandsmeistaratitlinum í dag, með 4-0 sýningu gegn Ipswich á útivelli í dag.

Möguleikar Arsenal á titlinum eru svo gott sem úr sögunni en liðið virðist ætla að tryggja sér 2. sætið í deildinni líkt og síðustu tvö ár.

Ipswich var að minnsta kosti engin fyrirstaða í dag og aðeins tímaspursmál hvenær liðið kveður deildina, nú fimmtán stigum frá öruggu sæti þegar aðeins fimm umferðir eru eftir.

Leandro Trossard var í fremstu víglínu hjá Arsenal og hann kom gestunum yfir á 14. mínútu. Ipswich hafði nánast varla snert boltann fram að því en Trossard skoraði eftir undirbúning Martins Ödegaard og Bukayo Saka.

Gabriel Martinelli skoraði svo á 28. mínútu, aftur eftir undirbúning Saka en einnig Mikel Merino.

Leikurinn var svo gott sem búinn þegar Ipswich missti svo í kjölfarið Leif Davis af velli með rautt spjald, fyrir ljótt brot á Saka.

Í seinni hálfleiknum var aðeins spurning hve mörg mörk Arsenal yrðu en Trossard bætti við sínu öðru marki og varamaðurinn Ethan Nwaneri skoraði fjórða markið þegar skammt var eftir.