Upp­fyllti hinstu ósk ömmu sinnar

Ketill verður nítján ára í lok ársins og stefnir á útskrift úr Menntaskólanum við Sund í vor. Samhliða náminu starfar hann sem trúbador. Hann gaf út sitt fyrsta lag, Þessi stund með þér, um miðjan ágúst í fyrra, lag sem hann samdi þegar hann var 15 ára.

Þrátt fyrir að vera ungur og upprennandi tónlistarmaður hefur Ketill þegar komið víða við, meðal annars sem gestur í hlutverki Alþýðu Bubba í sýningunni Níu líf um líf tónlistarmannsins Bubba Morthens, sem var sýnd í Borgarleikhúsinu. Ketill var á meðal fjölmargra sem komu sem gestir og sungu lagið Stál og hnífur fyrir áhorfendur.

Ketill segist stefna að því að gefa út sitt þriðja lag innan tíðar og einbeita sér að því að þróa sig áfram sem tónlistarmaður.

Erfitt en fallegt

Þegar hann er spurður um sambandið við ömmu sína, segir Ketill að þau hafi átt mjög gott samband og þau hafi getað rætt um allt milli himins og jarðar. 

„Hún var alltaf húmorísk, hlý, góð og yndisleg. Hún var svo áhugasöm og spurði alltaf hvernig okkur barnabörnunum gengi í skólanum og að því sem við tókum okkur fyrir hendur,“ segir Ketill. 

Það er augljóst hvað amma hans var honum kær. 

„Við höfðum oft talað við barnabörnin um það hversu heppin við vorum að eiga svona ótrúlega ömmu,“ segir Ketill og rifjar upp síðasta samtal þeirra þar sem hann þakkaði henni fyrir allt og kvaddi hana.

„ Ég sagði að ég elskaði hana og var að fara út þegar hún snýr sér við og segir: „Stattu þig á gítarnum.“ Það stakk svakalega djúpt.“ 

Hann segist ætla að hafa þessi orð með sér út í lífið.

Brast í grát í síðsta versinu

Sem fyrr segir flutti Ketill lagið Kveðja eftir Bubba Morthens, en hann hafði breytt textanum örlítið og tileinkað það ömmu sinni. Þetta var í fyrsta skipti sem hann fór í jarðarför og vissi hann ekki hvernig þetta færi fram.

„Ég hafði aldrei farið í svona jarðarför áður, og ég vissi ekki hvernig þetta myndi virka. Ég var með stórar hugmyndir um hvernig ég ætlaði að framkvæma þetta, og bað fólkið að syngja með mér þegar ég byrjaði að syngja. En þegar kom að síðasta versinu brotnaði ég niður. Það var svo fallegt þegar kórinn og aðrir gestir tóku undir með mér,“ segir Ketill.

„Ég var mjög stressaður og hafði talað við vinkonu mína um það. Hún hafði spilað fyrir afa sinn nýlega og það var mjög tilfinningalegt fyrir hana. Ég var hræddur um að ég myndi ekki ná að halda andliti,“ útskýrir hann.

Ketill ákvað að tala við fólkið á staðnum áður en hann hóf flutninginn og deildi með þeim sögunni um samtalið sem hann átti við ömmu sína áður en hún lést. 

„Ég byrjaði að tala og deila með fólki því sem amma hafði sagt við mig áður en ég fór út. Það var mjög erfitt, en þegar ég talaði frá hjartanu fann ég að ég gat gert þetta.“

Flutning Ketils má heyra í spilaranum hér að neðan.