Beina spjótum sínum að banda­rískum tæknifyrirtækjum

Um er að ræða undirbúning Kínverja fyrir væntanlegar viðræður við Donald Trump og mögulegar aðgerðir vegna tolla sem Trump hefur sett á kínverskar vörur.

Samkvæmt frétt Wall Street Journal eru Nvidia, Google, Apple og önnur tæknifyrirtæki á þessum lista. Yfirvöld í Kína eru þegar byrjuð að rannsaka Nvidia og Google vegna mögulegra samkeppnisbrota þar í landi en rannsóknin gegn Google var tilkynnt stuttu eftir að Trump bætti við tíu prósentum á tolla gegn Kína.

Sérfræðingar segja þessa áætlun Kínverja fela í sér ákveðnar áhættur, eins og til að mynda hættu á því að forsvarsmenn vestrænna fyrirtækja dragi úr fjárfestingum í Kína.

Bæði Trump og Joe Biden hafa sett tálma á það hvað bandarísk fyrirtæki mega selja til Kína og hvaða hugbúnaði veita megi Kínverjum aðgang að. Nvidia hefur til dæmis verið bannað að selja tilteknar tölvuflögur til kínverskra fyrirtækja og Google meinaði árið 2019 Huawei að nota Android-stýrikerfið í síma fyrirtækisins.

Bætti á gamla tolla

Á fyrsta kjörtímabili hans setti Trump fimmtán prósenta tolla á vörur frá Kína. Biden hélt þeim tollum og Trump bætti á þá tíu prósentum á dögunum. Þá tilkynnti hann í gær 25 prósenta tolla á ál og stálinnflutning til Bandaríkjanna, sem sérfræðingar segja að beinist aðallega gegn Kína.

Sjá einnig: Hótar 25 prósent tollum á allt stál og ál

Ráðamenn í Kína hafa einnig beitt Bandarískar vörur tollum vegna tolla Trumps. Þeir tollar voru settir á kol, jarðgas, landbúnaðarvörur og bíla frá Bandaríkjunum.

Tollar á stál og ál munu einnig koma niður á fjölmörgum öðrum ríkjum, eins og Kanada, Mexíkó, Brasilíu og einnig ríkjum í Asíu, eins og Suður-Kóreu, Víetnam, Ástralíu og Japan.

Sjá einnig: Loka á að­gengi Banda­ríkja­manna að mikil­vægum málmum

Trump og Xi Jinping, forseti Kína, munu ræða saman í síma á næstunni en ekki liggur fyrir nákvæmlega hvenær það símtal á að eiga sér stað.