Asninn að baki Asna allur

Þetta kemur fram í bandaríska fréttamiðlinum Palo Alto Online. Dýraþjálfarinn Jenny Kiratli sagði við miðilinn að asninn hafi verið svæfður á fimmtudag eftir erfiða baráttu við hófsperru.

Perry fæddist árið 1994 og flutti árið 1997 í almenningsgarðinn Bol Park í borginni Palo Alto í Kaliforníu. Hann varði stærstum hluta ævi sinnar með asnanum Miner Forty Niner sem dó árið 2016.

Perry vann það sér til frægðar að vera fyrirmyndin að karakternum Asna, helstu hjálparhellu tröllkarlsins Shrek, í fjórum Shrek-myndum. Bandaríski leikarinn Eddy Murphy talaði fyrir Asna í myndunum en í íslensku talsetningunni blés Laddi lífi í asnann. Hér fyrir nðean má sjá þegar Shrek rekst í fyrsta skiptið á hinn talandi Asna.

Hófsperra dró hann til dauða

Perry hafði glímt við hófsperru í einhvern tíma og lifði við gríðarlegann sársauka vegna þess. Þar að auki gat hann illa beitt afturfæti sínum vinstra megin og stóð því oft á þremur fótum. 

Að sögn starfsmanna í Bol-garði var allt gert til að lina sársauka Perry, margra mánaða nálastungumeðferð, laser-ljósameðferð og nudd. Hins vegar varð ljóst fyrr í vikunni hvert stefndi.

„Hann var greinilega mjög þjáður. Hann er búinn að vera á miklum verkjalyfum. Og við vorum með starfsmenn hjá honum allan daginn að fylgjast með honum í von um að eitthvað myndi lagast,“ sagði Kiratli.

Hún segir dauða asnans hafa verið friðsælan og meira en tólf starfsmenn hafi verið hjá honum þegar hann dó. Eftir að hann var svæfður var líki hans haldið í haganum í nokkra tíma til að félögum hans, ösnunum April og Buddy, væri ljóst að hann væri dáinn. 

Perry var frægur í Palo Alto og mætti fjöldi fólks í þrítugsafmæli hans í júní, þar á meðal þáverandi borgarstjóri Greer Stone. Þá lagði borgin einnig til tíu þúsund Bandaríkjadali (tæplega 1,4 milljón íslenskra króna) í sjúkrasjóð asnans.

Meðalaldur asna er einmitt þrjátíu ár en þeir geta orðið allt að fjörutíu ára gamlir.

Asninn sem hættir ekki að tala

Þó Shrek sé aðalstjarna Shrek-myndanna gefur hinn kjaftfori og málglaði Asni honum ekkert eftir. 

Fyrsta Shrek-myndin kom út 2001 og næstu níu árin bættust þrjár framhaldsmyndir við með reglulegu millibili. Von er á fimmtu myndinni á næsta ári, 25 árum eftir útgáfu þeirrar fyrstu.

Að sögn Kiratli bjó einn af teiknurum sem vann við gerð Shrek nálægt Bol-garði og benti kona hans honum á túnið þar sem Perry lifði. Hann fór síðan með hóp teiknara í garðinn og vörðu þeir nokkrum tímum með Perry til að ná honum almennilega. 

Þar með varð asninn Perry hluti af kvikmyndasögunni.