Amorim hefur ekki hug­mynd um hversu lengi hann verður að laga United

United tapaði 2-0 fyrir Wolves í gær. Þetta var fjórða tap liðsins í sjö leikjum í ensku úrvalsdeildinni undir stjórn Amorims.

Eftir leikinn á Molineux var Amorim spurður að því hvað það tæki langan tíma fyrir United að bæta sig. Svarið var ekki beint uppörvandi fyrir stuðningsmenn liðsins.

„Ég hef ekki hugmynd. Ekki hugmynd. Í staðinn fyrir að ég reyni að skilja hversu langan tíma það tekur þá snýst þetta um að bæta sig dag frá degi, horfa á myndbönd, nota hverja einustu mínútu á æfingum og reyna að ná í einhver stig því það er mikilvægt á þessum tímapunkti,“ sagði Amorim.

„Hugmyndin þarfnast tíma. Þetta verður erfitt. Við erum langt frá lokatakmarkinu og þannig er það. Við þurfum að halda áfram og einbeita okkur að næsta leik.“

United er í 14. sæti ensku úrvalsdeildarinnar með einungis 22 stig eftir átján leiki. Næsti leikur liðsins er gegn Newcastle United á Old Trafford á mánudaginn.