Konurnar aftur fleiri og sex fædd eftir 2000: Topp tíu listinn í ár

Óskar Ófeigur Jónsson skrifar 23. desember 2024 06:00

Handboltamaðurinn Gísli Þorgeir Kristjánsson var kosinn Íþróttamaður ársins í fyrra. Hér er hann með bikarinn. Gísli er ekki einn af þeim tilnefndu í ár. Vísir/Hulda Margrét

Nú er orðið ljóst hver voru besta íþróttafólk ársins á Íslandi á árinu 2024 að mati Samtaka íþróttafréttamanna. Vísir birtir í dag topp tíu listann yfir besta íþróttafólk ársins á Íslandi að mati meðlima SÍ en þetta er í 69. sinn sem samtökin kjósa Íþróttamann ársins.

Að venju er það opinberað rétt fyrir jól hvaða tíu fengu flest atkvæði en eins eru þrír tilnefndir sem þjálfari ársins og þrjú lið tilnefnd sem lið ársins.

Sex konur eru á topp tíu listanum annað árið í röð en það gerðist í fyrsta sinn í sögunni í fyrra. Karlarnir voru aldrei í minnihluta fyrstu 67 árin í sögu kjörsins en konurnar hafa nú verið í meirihluta tvö ár í röð.

Íþróttafólkið sem endaði í tíu efstu sætunum í ár kemur frá sex mismunandi íþróttasamböndum sem er einu færra en í fyrra. Fjórir knattspyrnumenn eða konur eru á listanum. Ólympískar lyftingar eiga í fyrsta sinn fulltrúa á topp tíu.

Íþróttmaður ársins 2023 ekki á lista

Ríkjandi Íþróttamaður ársins er ekki meðal tíu efstu að þessu sinni en Gísli Þorgeir Kristjánsson var kjörinn í fyrra í fyrsta sinn. Þetta er annað árið í röð sem Íþróttamaður ársins kemst ekki í hóp tíu efstu árið eftir.

Sex af tíu eru síðan fædd á þessari öld eða á árinu 2000 eða síðar. Elstur á topp tíu listanum er hinn 31 árs gamli Anton Sveinn McKee sem er sá eini sem eru komin yfir þrítugt.

Fimm á listanum í ár voru einnig meðal tíu efstu í fyrra en það eru Anton Sveinn McKee, Glódís Perla Viggósdóttir, Snæfríður Sól Jórunnardóttir, Sóley Margrét Jónsdóttir og Sveindís Jane Jónsdóttir. Ómar Ingi Magnússon er síðan aftur á topp tíu listanum eftir eins árs fjarveru.

Anton Sveinn og Glódís Perla eru búin að vera lengst samfellt á listanum en þau er í hópi tíu efstu þriðja árið í röð. Bæði eru þau inn á topp tíu listanum í fimmta sinn samanlagt.

Fjórir nýliðar

Fjögur eru síðan nýliðar í hópi þeirra tíu efstu eða það eru Albert Guðmundsson, Ásta Kristinsdóttir, Eygló Fanndal Sturludóttir og Orri Steinn Óskarsson. Albert fetar þar með í fótspor langafa síns og nafna sem var á listanum fyrir árið 1957 en einnig afa síns Inga Björns Alberssonar sem var á topp tíu listanum 1976 og 1977.

Tvö kvennalið og eitt karlalið eru tilnefnd sem íþróttalið ársins 2024. Það eru kvennalandslið Íslands sem tryggði sig inn á EM, kvennalandslið Íslands í hópimleikum sem varð Evrópumeistari og karlalið Vals í handbolta sem varð fyrsta íslenska félagið til að verða Evrópumeistari.

Þeir þjálfarar sem eru tilnefndir sem þjálfarar ársins eru Arnar Gunnlaugsson, þjálfari karlaliðs Víkings í fótbolta, Óskar Bjarni Óskarsson, þjálfari karlaliðs Vals í handbolta, og Þórir Hergeirsson, þjálfari kvennalandsliðs Noregs í handbolta. Arnar og Þórir voru báðir tilnefndir í fyrra

Kjörinu lýst á nýju ári

Þetta verður í 69. sinn sem Íþróttamaður ársins er útnefndur af Samtökum Íþróttafréttamanna en fyrstur til að hljóta þessa viðurkenningu var Vilhjálmur Einarsson árið 1956 en hann vann það ár silfurverðlaun á Ólympíuleikunum í Melbourne í Ástralíu.

Kjöri Íþróttamanns ársins verður lýst í Hörpu fimmtudagskvöldið 4. janúar 2025. Kjörið fer nú fram eftir áramót annað árið í röð.

Hér fyrir neðan má sjá hver eru tilnefnd fyrir frammistöðu sína á Íþróttaárinu 2024. Það er farið stuttlega yfir afrek hvers og eins.