Lífið leikur við Sveindísi Jane og Rob Holding

Líkt og Vísir hefur greint frá hefur parið verið saman um nokkurt skeið. Þau hafa haldið sambandinu utan sviðsljóssins enda einbeitingin inni á vellinum. Nú birtir Sveindís mynd af þeim þar sem má sjá þau í göngutúr með hund knattspyrnumannsins svo fátt eitt sé nefnt. 

„Lífið undanfarið. Ást, Ást, Ást,“ skrifaði Sveindís og birti skemmtilega myndaröð úr daglegu lífi á miðlinum frá því í nóvember. Ljóst að lífið leikur við hana. 

Hinn 29 ára gamli Holding er líklega þekktastur fyrir tíma sinn hjá Arsenal þar sem hann spilaði um sjö ára skeið frá 2016 og þar til í fyrra. Hann er nú á mála hjá enska úrvalsdeildarliðinu Crystal Palace en hefur ekki átt sjö dagana sæla þar nýverið og ekki spilað með aðalliði félagsins í lengri tíma.

Sveindís Jane er á mála hjá Wolfsburg í Þýskalandi og er ein besta knattspyrnukona sem Ísland hefur alið af sér. Hún hefur haft í nógu að snúast en hún gaf nýverið út barnabók með Sæmundi Norðfjörð, bók sem ber heitið Sveindís Jane - saga af stelpu í landsliði.

Fram hefur komið að Sveindís vilji með útgáfu bókarinnar veita ungum lesendum innblástur til að stunda reglubundna hreyfingu. Bókin hvetur lesendur til að eltast við drauma sína og stökkva á tækifæri þrátt fyrir að ýmsar áskoranir kunni að verða á leiðinni. 

Sveindís hefur sagt það mikilvægt að efla sjálfsmynd ungmenna, hvetja þau áfram og stuðla að jákvæðum samskiptum í leik og sporti. Reynsla hennar og saga hafi verið innblástur sem bókin byggir á og hún vilji koma á framfæri við ungt fólk.