Telja að Rodri vinni Gull­boltann og Vinícius mæti því ekki

Það er The Athletic sem greinir frá því að Rodri, sem varð Englandsmeistari með Man City á síðustu leiktíð og síðar meir Evrópumeistari með Spánverjum í sumar, hljóti verðlaunin. 

Fyrir fram var talið að brasilíski framherjinn Vinícius Júnior myndi vinna verðlaunin en hann var allt í öllu þegar Real Madríd varð Spánar- og Evrópumeistari síðasta vor.

The Athletic telur hins vegar að þar sem Rodri sé líklegastur til að hreppa hnossið þá muni Vinícius Jr. halda sig heima í Madríd og sniðganga verðlaunaafhendinguna.

Gullboltinn (Ballon d‘Or) hefur verið veittur frá árinu 1956 í karlaflokki en frá árinu 2018 í kvennaflokki. Talið er að Aitana Bonmatí, miðjumaður Barcelona og Spánar, „verji“ titilinn í kvennaflokki.