Stutt gaman hjá Brynjari og Júlíus kallaður til

Júlíus kemur inn í hópinn fyrir Brynjar Inga Bjarnason, miðvörð, sem meiddist í leik með HamKam í norsku úrvalsdeildinni í gær.

Brynjar Ingi hafði verið kallaður inn fyrir Sverri Inga Ingason sem varð að draga sig úr hópnum vegna meiðsla.

Júlíus á að baki fimm A-landsleiki, allt vináttulandsleiki. Hann spilaði síðast í leikjum við Svíþjóð og Eistland í janúar 2023. Hann var á varamannabekknum í fjórum leikja Íslands í undankeppni EM í fyrra.

Júlíus er fyrirliði Fredrikstad og komst með liðinu upp í úrvalsdeild í fyrra, þar sem liðið hefur gert afar góða hluti og situr núna í 5. sæti.

Íslenska landsliðið kemur saman í Reykjavík í dag og hefur æfingar fyrir leikina sem framundan eru. Fyrri leikurinn er á Laugardalsvelli á föstudag, gegn Svartfjallalandi, og sá seinni þremur dögum síðar á útivelli gegn Tyrklandi.

Báðir leikirnir verða í opinni dagskrá á Stöð 2 Sport.