Segir lúsmýið ekki biðja um of mikið

Hér má hlusta á lagið:

„Margt ljótt hefur verið sagt um lúsmý í gegnum tíðina. Frá því að þessir smávöxnu nýbúar námu hér land hafa þeir verið undir stöðugum ávirðingum. Skítkastið hefur gengið svo langt að fulltrúar tegundarinnar hafa séð sig tilneydda til þess að bera hönd fyrir höfuð sér.

Söngur lúsmýsins (pínulítið blóð) er glænýr skordýrarokks-smellur þar sem sjónarmiðum þeirra er haldið á loft,“ segir í fréttatilkynningu.

Tímamótalag í poppskordýrasögu Íslands

Þar segir sömuleiðis að lagið sé tímamótalag í poppskordýrasögu Íslands.

„Lúsmýið ber hönd fyrir höfuð sér og spyr: Af hverju eru öllum svona illa við okkur? Söngur lúsmýsins (pínulítið blóð) er glænýtt lag úr sýningunni Eltum veðrið sem verður frumsýnd í september á Stóra sviði Þjóðleikhússins. Eltum veðrið er glænýtt íslenskt leikverk; gamanleikur með söngvum, sem er skrifaður af leikhópnum. Tónlist verksins er eftir Sváfni Sigurðarson auk þess sem Hallgrímur Ólafsson leikari á eitt lag með Sváfni.“

Fyrr í sumar var lagið Lífið er skrítið gefið út og Söngur lúsmýsins því annað lagið sem kynnt er úr sýningunni. Alls verða átta lög úr sýningunni gefin út í september. Hér má hlusta á lögin á streymisveitunni Spotify.

Hallgrímur og Sváfnir hafa unnið saman að því að skrifa texta ásamt leikurum úr leikhópnum. Leikhópurinn samanstendur af Eygló Hilmarsdóttur, Guðjóni Davíð Karlssyni, Hallgrími Ólafssyni, Hilmari Guðjónssyni, Ilmi Kristjánsdóttur, Sigurði Sigurjónssyni og Þresti Leó Gunnarssyni. Auk þeirra lögðu Katrín Halldóra Sigurðardóttir og Steinunn Ólínu Þorsteinsdóttir sitt af mörkum til þróunar leikverksins framan af.

„Farið ekki að grenja“

Sváfnir Sigurðarson hefur verið iðinn við að gefa út tónlist á síðustu árum, en þetta er í fyrsta sinn sem hann gefur út tónlist sem samin er sérstaklega fyrir leiksýningu.

„Lúsmýið er ekki að biðja um mikið. Bara pínulítið blóð. Ekki gleyma því að á hverju ári fórna þau sér í milljónatali til þess að halda uppi fiskistofnum í straumvötnum og stöðuvötnum hér á landi. Án lúsmýs myndi þetta vistkerfi hrynja. 

Það er ekki svo há þóknun að landsmenn skilji gluggana eftir opna af og til og leggi sitt af mörkum. Nú er að minnsta kosti nóg komið af þessari rógsherferð og skítkasti í garð lúsmýsins. Hvað með það þótt þið þurfið að klóra ykkur í tvo til þrjá daga, farið ekki að grenja,“ segir Sváfnir kíminn.

Heil plata samhliða frumsýningu

Fleiri lög úr sýningunni Eltum veðrið verða gefin út í haust en von er á plötunni allri um miðjan september og mun hún einfaldlega bera nafn sýningarinnar Eltum veðrið. Um upptökur og hljóðblöndum sá Aron Þór Arnarsson.

Söngur: Hallgrímur Ólafsson og leikhópurinn

Kór: Hildur Vala Baldursdóttir, Hilmar Guðjónsson, Ilmur Kristjánsdóttir og Guðjón Davíð Karlsson

Gítar, hljómborð, bassi: Sváfnir Sigurðarson

Trommur: Sólrún Mjöll Kjartansdóttir