„Fólkið er kjarni Þjóð­há­tíðar og ég vildi sýna það“

Hér má sjá tónlistarmyndbandið við lagið Töfrar:

Bongó blíða eftir veðurviðvaranir

„Það var svo yndislegt að fá þennan dásamlega sólardag þegar við vorum taka upp eftir að hafa frestað tökum þrisvar sinnum út af gulum og appelsínugulum viðvörunum. Við þökkum kærlega fyrir afnotin af fallegu eyjunni, hún skartaði sínu fegursta þennan dag,“ segir Jóhanna Guðrún.

Lagið er samið af Klöru Elíasdóttur og Halldóri Gunnari Pálssyni sem einnig sá um útsetningu og upptökustjórn.

„Það var alveg magnað að fara með þessum frábæra hópi af fólki til Eyja að taka upp myndbandið við þjóðhátíðarlagið Töfrar, svo mikill heiður að fá þetta verkefni í heild sinni og enn ríkari upplifun að taka upp myndbandið og ramma lagið inn. Okkur fannst mikilvægt að heiðra og gera eyjafólki hátt undir höfði. Fólkið er kjarni Þjóðhátíðar, ég vildi sýna það og ég gæti ekki verið ánægðari með útkomuna,“ bætir Jóhanna Guðrún við.

Þriðja skipti frá upphafi sem lagið er samið og flutt af konu

Halldór Gunnar Lagahöfundur og fjallabróðir segir alltaf mikinn heiður að fá að taka þátt í því að gera Þjóðhátíðarlag.

„Svo var alveg dásamlegt að fá að vinna það með Jóhönnu og Klöru.“

Leikstjórn og eftirvinnsla var öll í höndum UNDIR EINS og er leikstjórinn Birgitta Stefánsdóttir. Hörður Þórhallsson vann myndbandið og sá um myndatöku og Birgitta sá um að litgreina það. Bergþór Vikar Geirsson var aðstoðar tökumaður. Klara Elías sá um förðun og stíliseringu og Hildur Ösp og Klara sáu saman um hár. 

„Að laginu kemur einvala lið listafólks og þar má helst nefna Fjallabræður sem koma fram í þessu einstaka lagi. Lagið er einnig óður til fyrri laga og flytjenda, en í ár fagnar Þjóðhátíð 150 ára afmæli. Einnig er gaman að nefna það að þetta er í þriðja skiptið frá upphafi sem lagið er samið og flutt af konu,“ segir í fréttatilkynningu frá Iceland Sync.

Hér má hlusta á lagið á streymisveitunni Spotify og hér má sjá myndbandið á Youtube.