Gular við­varanir enn í kortunum

Gular veðurviðvaranir taka gildi klukkan 19 á Ströndum og Norðurlandi vestra, Norðurlandi eystra og Miðhálendinu vegna slyddu eða snjókomu. Vindur nær sér ekki á strik, svo þessi síðasti skammtur er skárri en þeir fyrri að því leyti, að því er segir í hugleiðingum veðurfræðings hjá Veðurstofunni.

Í fyrramálið styttir upp og þegar kemur fram á morgundaginn er norðan gola eða kaldi í kortunum og lítil eða engin úrkoma norðantil, en nokkuð þungbúið þar samt áfram og kalt. Sunnan heiða léttir til með hita 7 til 13 stig.

Í kvöldfréttum í gær var rætt við veðurfræðing sem sagði erfitt að spá fyrir um sumarið. Eftir gusuna sem lendi á landinu í kvöld séu spárnar þannig að veður eigi að vera rólegra. Um helgina og á mánudag verði róleg norðanátt.